کابل( پژواک، ٧ مرغومى ٩٣): د ملي امنيت رياست وايي، چې د لوګر د پخواني والي ارسلا جمال په وژنه کې د لاس لرلو په تړاو يې دوه تنه نيولي دي.
د ملي امنيت رياست وياند حسيب صديقي، پژواک خبري اژانس ته وويل، چې د نورالله فاروفي او دلاور په نومونو ياد دوه کسان د کابل ښار د دوولسمې ناحيې په مربوطاتو کې نيول شوي دي.
ده د يادو کسانو د نيولو کره وخت په ډاګه نه کړ او ويې ويل چې فاروقي د ځانمرګو بريدګرو د محاذ له پوځي چارواکو څخه دى او دلاور هم د هغه کس دى.
د لوګر والي ارسلا جمال، په ١٣٩٢ کال کې د لوى اختر په لومړۍ ورځ د لوګر د مرکز پُل علم په جامع جومات کې د خبرو پر مهال د چاودنې له امله ووژل شو. په دې چاودنه کې ٢٠ تنه نور ټپيان شوي وو.
