ګردېز (پژواک، ١٢ کب ٩٣): د پکتيا ولايت چارواکي او اوسېدونکي وايي چې د ګردېز- لوګر لويه لاره د باروړونکو موټرو د تګ راتګ له امله ډېره تخريب شوې او جدي ترميم ته اړتيا لري.
دوى وايي چې که ددې سړک د ترميم لپاره ژر ګام پورته نه شي، نو بيا به يې جوړول د نوي سړک جوړولو هومره پيسو ته اړتيا ولري.
د پکتيا د ولايتي شورا غړی تاج محمد منګل وايي چې د سړک خرابولي د پکتيا خلک او موټر چلوونکي له ډېرو ستونزو سره مخ کړي دي.
منګل وايي: “دې لويې لارې درزونه کړي او ان تر لوګره پورې خرابه شوې ده.”
د کابل-ګردېز لويه لاره چې ١١٨ کيلو متره اوږدوالى لري، شپږ کاله وړاندې د يوه ترکي ساختماني شرکت له خوا جوړه شوه.
دا سړک د هېواد له يو څه معياري سړکونو ګڼل کېږي، خو په دې وروستيو کې له ګردېز څخه تر لوګره پورې ځاى ځاى چاودېدلى او د لوړ وزن موټرو د تګ راتګ له امله پړسېدلى دى.
منګل وايي، که ددې سړک د بېرته ترميمولو لپاره حکومت لاس په کار نه شي، نو په نږدې راتلونکي کې به له کاره ووځي.
د ولايتي شورا غړي له اړونده دولتي ادارو غواړي چې د سړکونو د ساتنې په موخه پر موټرو کنټرول وساتي او هغو موټرو ته د تګ اجازه ورنه کړي، چې د توکو وزن يې له ټاکل شوي معيار څخه ډېر وي.
د کابل-ګردېر د لويې لارې يو موټر چلووونکى زين الله وايي چې که د سړک خرابوالى له يوې خوا په تګ راتګ کې د ځنډ لامل کېږي، له بلې خوا موټرو ته هم زيان رسوي.
زين الله چې پر دې لاره د سپرليو موټر چلوي وايي چې که دولت پر وخت دې سړک ته پاملرنه ونه کړي، نو بيا به يې ترميم د نوي سړک د جوړولو په بيه ورپرېوځي.
زين الله وايي چې که څه هم د ګردېز-کابل سړک د هېواد نورو سړکونو ته په کتو په ښه معيار جوړ شوى وو، خو د حکومت د نه پاملرنې له امله يې عمر لنډ شو.
دى وايي چې که حکومتي ادارې د باروړونکو موټرو د اضافي وزن مخه نيولې واى، نو اوس به سړک په دې حال کې نه واى.
د پکتيا د فوايد عامې رييس انجنير عبدالله درانى وايي چې د ګردېز-کابل د لويې لارې د خرابوالي لامل د بهرنيو ځواکونو د اکمالاتي موټرو تګ راتګ دى.
د دراني په خبره، له خوست، پکتيا او پکتيکا څخه ددغو ځواکونو د تدارکاتو موټرو په ډېر وزن له دې لارې تګ راتګ کړى چې د سړک د “څه ناڅه خرابوالي” لامل شوى دى.
خو د پکتيا د فوايد عامې رييس وويل چې له دې پرته يې د عامو وګړو د باروړونکو موټرو وزن کنټرول کړى او هېڅ موټر ته يې له اضافي وزن سره د تګ راتګ اجازه نه ده ورکړې.
نوموړي وويل، د فوايد عامې رياست په پام کې لري چې د باروړونکو موټرو د وزن د کنټرول لپاره د پټان په سرحدي ولسوالۍ او د خوست-ګردېز په لويه لاره کې د لوړ تناژ ترازوګانې نصبې کړې دي.
د فوايد عامې وزارت چارواکي وايي، چې ددې سړک د ترميم لپاره به ډېر ژر ګام پورته کړي.
ددې وزارت مرستيال انجنير احمد شاه وحيد چې څو ورځې وړاندې يې له پکتيا څخه ليدنه کړې پژواک خبري اژانس ته وويل: “ما او زموږ تخنيکي ټيم په خپله په دې سړک کې راپيدا شوې ستونزې وليدلې، د ترميم لپاره يې حتمى اقدام کوو.”
وحيد وايي چې د ګردېز-کابل لويه لاره د افغانستان له مهمو لارو څخه بلل کېږي او د فوايد عامې وزارت د حفظ او مراقبت په پلان کې شامله ده ، چې خامخا به ترميم شي.
دا په داسې حال کې ده چې څو ورځې وړاندې د ګردېز- پټان ولسوالۍ د ١٠٥ کېلومتره سړک د بيارغونې چارې پيل شوې دي.
