واشنګټن (پژواک، ١٦ کب ٩٣): د امريکا د بهرنيو چارو وزارت له خوا د ښځو د نړيوالې ورځې په وياړ د افغانستان لومړۍ ښځينه پيلوټې ته د زړورتيا جايزه ورکړل شوه.
د امريکا د بهرنيو چارو وزارت هر کال د نړۍ لسو ښځو ته چې د ښځو د حقونو او د ښځو د خدمتونو په برخه کې يې د پام وړ فعاليتونه کړي وي، د زړورو ښځو جايزې ورکوي.
د دې جايزې لپاره هغه مېرمنې ټاکل کېږي چې په دې برخه کې يې ځانګړى جرئت او مېړانتوب ښودلى وي، د ښځو د حقونو لپاره يې ډېره مبارزه کړې وي او خپل ژوند يې په خطر کې اچولى وي.
د دې جايزې لپاره، په ټاکل شوو لسو مېرمنو کې سږ کال د افغانستان لومړۍ ښځينه پيلوټه بريدمنه نيلوفر رحماني هم شامله ده.
د امريکا د بهرنيو چارو وزارت له خوا د کب په ١٣مه په يوه خپره شوې خبرپاڼه کې راغلي چې د مېرمن رحماني په ګډون يادو ښځو ته پرون د يو لړ مراسمو په ترڅ کې دغه جايزه ورکړل شوه.
په دې مراسمو کې د امريکا لومړۍ مېرمنې مېچل اوباما، د بهرنيو چارو وزارت يو شمېر چارواکو او يادو مېرمنو برخه اخيستې وه.
مېچل اوباما پيلوټې رحماني ته ددې جايزې ورکولو پر مهال وويل : (( د افغانستان په تاريخ کې لومړۍ ښځينه پيلوټه نيلوفر رحماني د طالبانو او کورنۍ له ګواښونو سره سره يې خپلو زده کړو ته ادامه ورکړه او پيلوټه شوه.))
د هغې په وينا، د افغانستان ولس او ټوله نړۍ پر نيلوفر وياړي.
نيلوفر په ١٨ کلنۍ کې د افغانستان له هوايي ځواک سره يو ځاى شوه، د پيلوټۍ زده کړې يې پيل کړې او تېر کال د بريدمنې په رتبه کې د پيلوټۍ له زده کړو فارغه شوه.
د يادونې ده، تېر کال د امريکا د بهرنيو چارو وزارت له خوا په کابل کې د ملالۍ روغتون مشرې ډاکټر نسرين اورياخېل ته د زړورتيا جايزه ورکړې وه.
