ايبک (پژواک ١٧ زمرى ٩٤): د سمنګانو مرکز په ايبک ښار کې نن د لومړي ځل لپاره د ٣٢ ځوانو جوړو ډله ييز واده تر سره شو.
د ډله ييزو ودونو دغه مراسم، په سعودي عربستان کې مېشت د ياد ولايت يوه اوسېدونکي حاجي عبدالقدوس ارباب زاده په مالي مرسته د ايبک ښار د قصر الماس په هوټل کې د ښځو او نارينه وو په دوو جلا محفلونو کې تر سره شول.
په دغو مراسمو کې د ناوې ګانو او زومانو شاوخوا درې زره خپلوانو هم ګډون درلود.
يوه ديني عالم مولوي عبدالقدير چې په دغو مراسمو کې وينا وکړه، د دا ډول مراسمو تر سره کول يې د اسلام دين له حکمونو سره سم وبلل او په ترڅ کې يې له خلکو وغوښتل، چې د ودونو مراسم د اسلام دين له احکامو سره سم تر سره کړي او له ډېرو لګښتونو ډډه وکړي.
د ولايتي شورا غړي او د دغو مراسمو د تر سره کولو کميسيون مشر محمد هاشم وويل، يادې ٣٢ جوړې، هغه ځوانان او پېغلې دي چې د اقتصادي ستونزو له امله يې د ودونو د تر سره کولو پيسې نه درلودې.
هغه وويل، يادې ٣٢ جوړې د دغه ولايت د حضرت سلطان، خرم سارباغ او دره صوف پايين ولسواليو اوسېدونکې دي.
نوموړي څرګنده کړه، چې حاجي عبدالقدوس د دغو مراسمو له ترسره کولو سربېره هرې جوړې ته يوه ١٢ متره قالينه، د عربي سرو زرو يوه ګوته او ٥٠٠ امريکايي ډالره هم ورکړي دي.
د هغه د معلوماتو پر بنسټ، له يادو ډاليو سره د دغو مراسمو ټول لګښتونه ٥٥زره امريکايي ډالره شوي دي.
حاجي عبدالقدوس وويل، د دغو مراسمو له تر سره کولو يې موخه له هغو ځوانانو سره مرسته ده، چې په دې وروستيو کلونو کې د پيسو د نه شتون له امله د خپلو ودونو د تر سره کولو وس نه درلود.
د ايبک ښار يوه اوسېدونکي او زوم عبدالبصير، د پچې له مخې د پروګرام غور کس وپېژندل شو او د ١٥٠٠ ډالرو جايزه يې هم تر لاسه کړه.
يوه بل زوم او د خواجه اسماعيل ايبک کلي ٢٨ کلن عين الدين وويل: "څلور کاله وړاندې مې کوژده کړې وه، په تېرو درېيو کلونو کې کابل ته لاړم او کار مې وکړ او د خپلې ښځې درې لکه افغانۍ مهر مې ورته ورکړ، خو په ياده موده کې مې ونه شوى کولى چې د پيسو د نه شتون له امله واده وکړم."
هغه د نورو زومانو په استازيتوب له حاجي عبدالقدوس او د دغو مراسمو د تر سره کوونکي له پلاوي مننه وکړه او له ټولو کسانو چې اقتصادي وړتيا لري، وغوښتل چې د مرستې په ډول له هغو ځوانانو سره چې اقتصادي ستونزې لري، دا ډول مراسم تر سره کړي.
دا په داسې حال کې ده، چې په وروستيو څو کلونو کې د هېواد په ځينو نورو ولايتونو لکه کابل، بلخ، پروان، بغلان، هرات او نورو کې هم دا ډول مراسم تر سره شوي دي.
غړي
You need to subscribe to view the full article. Please login or register a new account.
