منځپانګې ته تلل
دوشنبه ۱۶ نومبر ۲۰۲۶ · کابل ۷:۵۴ غ.م
۳° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

په ښرنه کې د ملکي روغتون ډاکټرانو کاري اعتصاب کړى

پژواک خبري اژانس
· ۳ دقیقې لوستل · ۸۶ کتنې

ښرنه (پژواک، ٢٤ زمرى ٩٤): د پکتيکا د مرکز ښرنې د ملکي روغتون ډاکټرانو په کاري اعتصاب لاس پورې کړى او د روغتون دروازه يې د ناروغانو پر مخ تړلې ده.

د ياد روغتون ډاکټرانو وروسته له هغه پر کاري اعتصاب لاس پورې کړى چې تېره شپه د دغه ولايت د ولايتي شورا مشر يوه ډاکټر ته سپکې سپورې وويلې او د دندې د پرېښودو ګواښ يې ورته وکړ.

د ښرني د ملکي روغتون مشر ډاکټر چنار د زمري په ٢٤مه پژواک خبري اژانس ته وويل چې تېره شپه د دغه ولايت د ولايتي شورا مشر افسرخان سليمانخېل يو ډاکټر ته په روغتون کې سپکې سپورې ويلې  دي.

هغه وويل چې د ولايتي شورا د مشر د يادې کړنې په غبرګون کې د روغتون ډاکټرانو پر کاري اعتصاب لاس پورې کړى او د روغتون دروازه يې د ناروغانو پر مخ تړلې ده.

ده زياته کړه: ((تر هغه به د دغه روغتون ډاکټران د ناروغانو درملنه ونه کړي، تر څو د ولايتي شورا رييس عدلي او قضايي ارګانونو ته نه وي ور پېژندل شوى او زموږ د حقوقو پوښتنه ترې نه وي شوې.))

د ښرنې د روغتيايي شورا مشر حاجي سيدالله پژواک ته وويل چې د ولايتي شورا رييس له خپل موقف څخه ناوړه ګټه پورته کوي او تېره شپه يې ډاکټران هم ګواښلي دي.

د ياد روغتون مخ ته لسګونه ناروغان راټول شوي وو.

د دغو ناروغانو له ډلې محمد طاهر پژواک ته وويل: ((موږ سهار دلته راغلي يو خو د روغتون دروازه تړلې ده او ډاکټران کار نه کوي.))

د هغه په وينا، که هر څه ژر د روغتون دروازه د ناروغانو پر مخ پرانيستل نه شي ډېر خلک به له ګڼو روغتيايي ستونزو سره مخ شي.

د پکتيا د ولايتي شورا مشر افسر خان سليمانخېل په دې اړه له څه ويلو ډډه وکړه.

خو د دې شورا منشي عزيز ارګوني پژواک ته وويل چې تېره شپه د شورا مشر د خپلوانو د پوښتنې لپاره روغتون ته ورغلى و.

د هغه په وينا، له ډاکټرانو د يو ناروغ د شکايت له امله د شورا مشر يو ډاکټر ګواښلى او سپکې سپورې يي ورته ويلې دي.

هغه زياته کړه چې افسرخان سليمانخېل همدې ډاکټر ته بيا د دندې پرېښودو ګواښ هم کړ‌ى دى.

خو د پکتيکا د عامي روغتيا رييس ډاکټر ولي پژواک ته وويل چې د يادې موضوع په اړه يې له والي او نورو چارواکو سره خبرې کړې او ډېر ژر به بېرته روغتون د ناروغانو پر مخ پرانيستل شي.

هغه وويل چې د ولايتي شورا د مشر د يادې کړنې په بدل کې به ورسره قانوني چلند وشي.

د پکتيکا د ښرنې ملکي روغتون چارواکو د معلوماتو له مخې، هره ورځ سلګونه ناروغان دې روغتون ته د درملنې په موخه مراجعه کوي.

 

 

 

 

غړي

You need to subscribe to view the full article. Please login or register a new account.

اړوند خبرونه

ټول روغتیا