منځپانګې ته تلل
دوشنبه ۱۶ نومبر ۲۰۲۶ · کابل ۸:۲۲ غ.م
۵° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

لسګونه افغان ماشومان د درملنې لپاره المان ته ولېږل شول

· ۳ دقیقې لوستل · ۱۴۲ کتنې

کابل (پژواک، ٢٧ زمرى ٩٤): افغاني سرې مياشتې ٤٥ ماشومان د درملنې په موخه د جرمني هېواد د "سولې ښارګوټي" ته لېږلي او ٥٥ افغان ماشومان به په راتلونکو دريو ورځو کې له درملنې وروسته کابل ته راستانه شي.

د افغاني سرې مياشتې د نړيوالو اړيکو او خپرونو مشرې صارمه افضلي، نن (د زمري ٢٧مه) په يوې خبري ناسته کې وويل چې د المان د سولې ښارګوټي ته د ماشومانو د لېږد په ٧٢ پړاو کې، د ژورې سوځېدنې او اورتوپيدي د څېرې د بدلون ٤٥ ماشومان د المان ښار ياد ښارګوټي ته ولېږل شول.

مېرمن افضلي زياته کړه چې د دغو ماشومانو په منځ کې لس نجونې او پاتې نور ټول هلکان شامل دي.

سرچينې زياته کړه: "په المان کې به د دغو ماشومانو درملنه تر هغه پورې دوام ومومي چې د دوى روغتيايي حالت ښه شي، پر دې سربېره کورنيو ته روزنه ورکول کېږي چې د خپلو ماشومانو له راستنېدو وروسته، تر بشپړې روغتيا پورې له هغوى څنګه پاملرنه وکړي."

د سرې مياشتې د خپرونو او نړيوالو اړيکو مشرې د خپلو خبرو په دوام کې وويل، چې دوى د ماشومانو د لېږد په لړۍ کې چا ته لومړيتوب نه ورکوي، کوم ماشوم چې په هېواد کې د درملنې وړ نه وي، له دې پرته چې د کومې کورنۍ غړى دى؛ پيسې لري او که نه، المان هېواد ته لېږل کېږي.

د سرچينې د معلوماتو پر بنسټ، د المان د سولې ښارګوټي ډاکټران هر کال دوه ځلې "په زمري او سلواغې" مياشتو کې د ناروغو ماشومانو د تشخيص او المان کې د درملنې لپاره د دوى د چمتووالي لپاره کابل ته راځي او د ماشومانو ټاکنه په همدوى پورې اړوند ده.

پر دې سربېره د افغاني سرې مياشتې يادې مسوولې وويل، چې پر هر ناروغ ماشوم له ٦ زرو يورو څخه تر لسو زرو پورې لګښت راځي.

هغې وويل: "تر اوسه پورې له څلورو زرو ډېر ماشومان د افغاني سرې مياشتې له لوري د سولې ياد ښارګوټي ته لېږل شوي او له درملنې وروسته بيرته هېواد ته راستانه کړل شوي دي."

ورته مهال نوموړې، د هغو ٥٥ افغان ماشومانو د بيا راستنېدو په اړه چې د افغاني سرې مياشتې او المان د سولې ښارګوټي په مرسته د درملنې په موخه المان ته لېږل شوي و، خبر ورکړ.

يادې سرچينې په دې اړه چې دغه ٥٥ ماشومان د څه مودې لپاره په المان کې تر درملنې لاندې و، معلومات ورنکړل، خو ويې ويل چې ياد ماشومان ټاکل شوې د روان کال د وږي مياشتې په لومړۍ نېټه کابل ته راستانه شي.

د نيمروز ښار اوسېدونکې يوولس کلنه انيسه، د هغو ماشومانو له ډلې ده چې نن د درملنې په موخه المان هېواد ته ولېږل شوه.

هغه پژواک ته وويل چې تېر کال يې کور د راکټ د لګېدو له امله وسوځېد او په دغه پېښه کې د هغې نيم ځان هم سوځېدلى دى.

هغې د دې خبرې په څرګندولو سره چې د يوه کال په موده کې يې ډېره درملنه کړې، خو تر اوسه پورې نه ده ښه شوې او اوس چې المان ته لېږل کېږي؛ ډېره خوشاله ده.

هغې وويل: "دا چې المان ته د درملنې لپاره ځم، ډېره خوشاله يم."

بسم الله چې د زوى پښه يې کږه ده او نن المان ته د درملنې په موخه ولېږل شو، پژواک خبري اژانس ته وويل چې د هغه اقتصادي وضعيت ښه نه دى او له همدې امله يې د زوى درملنه ونشوى کولى.

هغه وويل: "د کابل په ښار کې د سګرټو ګاډۍ لرم، د دغه زوى د درملنې وس مې نه درلود."

هغه د افغاني سرې مياشتې او المان هېواد له مسوولينو مننه وکړه چې د دوى د ماشومانو درملنه کوي.

 

 

 

 

غړي

You need to subscribe to view the full article. Please login or register a new account.

اړوند خبرونه

ټول روغتیا