خوست ښار (پژواک، ١٠ تله ٩٤): د خوست د ټولو دولتي روغتيايي مرکزونو ډاکټران او کارکوونکي وايي، له تېرو شپږو مياشتو راهيسې يې معاشونه نه دي اخيستي او د کاري اعتصاب ګواښ کوي.
د دې ولايت د ډاکټرانو د اتحاديې مسوولين وايي، له هغه مهال راهيسې، چې د روغتيا نړيوالې شبکې ( Health Net ) په خوست کې فعاليت پای ته رسېدلی، هېڅ روغتيايي کارکوونکي معاش نه دی اخيستی.
دغې روغتيايي شبکې، شپږ مياشتې مخکې د هېواد له عامې روغتيا وزارت سره په ولايتونو کې د روغتيايي خدماتو په برخه کې خپل قرارداد بايلوده او د داوطلبۍ پرمهال يوې بلې روغتيايي موسسې وګاټه.
د خوست د ډاکټرانو د اتحاديې مشر ډاکټر نورالله نوري يوې خبري کنفرانس ته وويل، چې د ۳ مياشتو معاشونه يې پخوانۍ موسسې وړي او د درېيو نورو مياشتو معاشونه له اوسنۍ موسسې سره پاتې دي.
هغه زياته کړه، د مرکز د ولايتي ملکي روغتون او د ولسواليو د روغتيايي مرکزونو د ټولو کارکوونکو شمېر تر ۷سوه اوښتی، چې له دې ډلې هېڅ يوه هم معاش نه دی اخيستی.
نوموړي وويل: ((د اړوندو موسساتو، ولايتي شورا او مرکزي دولت سره مو پرله پسې اړيکې ونيولې او له ولايتي ادارې سره مو ناستې وکړې، خو تراوسه مو مثبت ځواب نه دی ترلاسه کړی)).
پر دې سربېره پر نړيوالې روغتيايي شبکې دا نيوکې هم کېږي، چې په خوست ولايت کې يې د خلکو اړتياوې نه وې پوره کړې او بې کيفيته روغتيايي خدمات يې وړاندې کول.
د اسماعيل خېلو او مندوزيو ولسوالۍ د روغتيايي مرکز مسوول ډاکټر فريد پر يادې شبکې تور ولګاوه، چې په قصدي ډول غواړي، د دوی پر معاشونو خېټه واچوي.
هغه زياته کړه: ((نړيوالې روغتيايي شبکې قرارداد وبايله، نو د دې لپاره چې خپل تاوان جبران کړي او له ګټونکې موسسې انتقام واخلي، زموږ معاشونه يې تښتولي دي)).
د خوست د دولتي روغتيايي مرکزونو ياد کارکوونکي وايي، که تر راتلونکې پنچشنبې يې معاشونه حواله نه شي، پر کاري اعتصاب سربېره به سوله ييز لاريونونه وکړي.
د نادرشاه کوټ ولسوالۍ د شمبوات د کلينيک مسوول ډاکټر محمد حکيم ياد خبري کنفرانس ته وويل: ((که تر راتلونکې پنجشنبې معاشونه رانه کړل شي، زموږ اخري پرېکړه دا ده، چې د قومي خلکو په ملاتړ به ټول مرکزونه وتړو)).
پژواک هڅه وکړه، چې د روغتيا له نړيوالې شبکې يا Health Net د مسوولينو غبرګون هم واخلي، خو له بيا، بيا هڅو سره، سره يې کوم ځواب ترلاسه نه کړ.
د خوست د عامې روغتيا سرپرست ډاکټر هدايت الله حميدي وايي، له خپل وزارت سره يې د خبرو په پايله کې ډاډ تر لاسه کړی، چې د راتلونکې يوې اونۍ په موده کې به دغه ستونزه هواره کړي.
هغه وويل: ((د عامې روغتيا له مشرتابه سره مو مستقيماً تماس ونيوه، دوی ژمنه وکړه، چې په راتلونکې يوه اونۍ کې به ټول معاشونه ورکړل شي)).
تر دې مخکې هم د خوست روغتيايي کارکوونکو د خپلو معاشونو د ځنډېدو له امله، څو ځله کاري اعتصابونه کړي، چې غټ لامل يې د يادې روغتيايي شبکې د مسوولينو بې پروايي بلل شوې وه.
غړيYou need to subscribe to view the full article. Please login or register a new account.










