کابل (پژواک، ٢١ تله ٩٤): د افغانستان د درمليزو خدمتونو ټولنې په داسې حال کې د کندوز له حوزوي روغتون سره پنځه ټنه درمل مرسته وکړه چې په وروستيو دوو اوونيو کې ٩٠ مړي او زر ټپيان د دغه ولايت روغتيايي مرکزونو ته لېږدول شوي دي.
طالبانو د تلې په شپږمه کندوز ښار ونيو؛ خو امنيتي ځواکونو په تدريجي ډول طالبان له ښار څخه و ايستل او اوس اوضاع يو څه عادي شوې ده.
پنځه ټنه ياد درمل نن په کابل کې د عامې روغتيا وزارت ته وسپارل شول.
د عامې روغتيا وزير ډاکتر فيروزالدين فېروز د درملو سپارلو په مراسمو کې وويل چې په يادو درملو کې ٤٥٠ قلمه بېلابېل درمل شامل دي چې ټولټال ارزښت يې څه باندې ٤٠زره امريکايي ډالرو ته رسېږي.
د هغه په وينا، سره له دې چې د کندوز روغتيايي مرکزونه د درملو او روغتيايي کارکوونکو له کمښت سره مخ نه دي؛ خو د عامې روغتيا وزارت نن دا درمل کندوز ته لېږي.
د هغه په وينا، د کندوز نا امنيو او جګړو له پيل څخه، د بلخ والي هم لسګونه ټنه درمل هغه ولايت ته لېږلي دي او له کابل څخه هم روغتيايي ډلې د ټپيانو درملنې لپاره کندوز ته استول شوې دي.
د عامې روغتيا وزارت وويل چې په کندوز کې د مړو او ټپيانو کره شمېرې تر اوسه څرګندې نه دي؛ خو شاوخوا ٩٠ مړي او زر ټپيان چې ډېرى يې ملکي کسان دي، د کندوز په روغتونونو او روغتيايي مرکزونو کې ثبت شوي دي.
هغه زياته کړه چې د دولت وسله وال مخالفين او امنيتي ځواکونه هم په ټپيانو کې شامل دي.
د هغه په وينا، ډېرى ټپيان تداوي شوي دي او يو شمېر نور يې لا هم په روغتيايي مرکزونو کې تر درملنې لاندې دي.
د عامې روغتيا وزير يادونه وکړه چې دغه وزارت هڅه کوي څو د کندوز په جګړو کې د وژل شوو او ټپيانو کره شمېره ترلاسه او له رسنيو سره يې شريکه کړي.
د هغه په وينا، دا مهال د کندوز يو شمېر ښاريان د نا امنيو له امله په رواني ستونزو او موسمي ناروغيو لکه نس ناستي (اسهال) او سينه بغل اخته شوي چې ياد درمل د هغوى درملنې لپاره اغېزمن دي.
د افغانستان د درمليزو خدمتونو ټولنې مشر عبدالخالق ځاځي د درملو سپارلو په مراسمو کې وويل: "کندوز زموږ کور دى، کندوز خلک پر موږ حق لري او موږ د خپلو هېوادوالو ستونزه احساسوو له خپل وس سره سم مو دا درمل راغونډ کړي دي."
د هغه په وينا، دا ټولنه چمتو ده چې له عامې روغتيا وزارت سره خپلو همکاريو ته ادامه ورکړي.
غړي
You need to subscribe to view the full article. Please login or register a new account.










