منځپانګې ته تلل
یکشنبه ۲۲ نومبر ۲۰۲۶ · کابل ۲:۳۰ غ.م
۳°صاف · ↑۱۳° ↓۲°د هوا کیفیت: منځنی
غړي

د خوست بېوزلې مېرمنې له مرستندويو د مرسته غوښتنه کوي

· ۴ دقیقې لوستل · ۱۰۳ کتنې

خوست ښار (پژواک، ١٧ ليندۍ ٩٤): د خوست هغه مېرمنې چې د خپلو کورنيو سرپرستي پرغاړه لري، له مرستندويه ټولنو غوښتنه کوي چې له دوی سره د اقتصادي ستونزو په هواري کې مرسته وکړي.

دوی دا غوښتنه داسې مهال کوي چې په خوست او پکتيا کې د قومونو د اړيکو دفتر يا TLO په نوم يوه مرستندوی بنسټ د کونډو ښځو د اقتصادي ستونزو د هواري په موخه د مالدارۍ په برخه کې د مرستو لړۍ پيل کړې ده.

مسوولين وايي چې د ياد پروګرام په ترڅ کې د کورنيو سرپرستو مېرمنو ته د وزو او غواګانو د ښې روزنې د زده کړو تر څنګ يې تر اوسه نږدې سلو کونډو ښځو ته د چرګانو فارمونه جوړ کړي دي.

په خوست کې د ياد دفتر د ښځو د څانګې مسوولې مېرمن ناديه باوري پژواک اژانس ته وويل، غواړي چې د مالدارۍ له پلوه له کونډو مېرمنو سره تر يوه بريده مرسته وکړي.

هغې وويل: ((مثلاً له شيدو مستې جوړوي او بيا غوړي ترې باسي، خو د شيدو او مستو د خرڅلاو لاره نه ده ورته معلومه. غواړو چې د لبنياتو د پروسس له طريقې په کور دننه د عايداتو منبع ولري.))

ناديې باوري زياته کړه چې د مالدارۍ د ښې روزنې او د چرګانونو د فارمونو د جوړولو په دغه پروګرام کې هغو مېرمنو ته لومړيتوب ورکوي چې نسبت نورو ته ډېرې اړمنې دي.

په همدې حال کې د ياد پروګرام مسوول ډاکتر ازهر وايي چې تر اوسه يې په خوست کې له سلو کونډو مېرمنو سره مرستې کړې او سل، سل چرګان يې ورکړي، خو غواړي دغه پروګرام نور هم پراخ کړي.

نوموړى وايي: ((زموږ ټول پروګرام لس کلن دی. خو د اوس لپاره يو کلن ازمايښتي پروګرام روان دی. که چېرې ښه پايله ورکړي، راتلونکی کال يې د پکتيا او خوست ۲۳ ولسواليو ته غځوي.))

هغه وويل چې اوس مهال د پکتيا په ميرزکه، ځاځي اريوب، ډنډپټان او د خوست په ګربزو، تڼيو او ځاځي ميدان ولسواليو کې فعاليت لري او مالي تمويل يې د امريکا نړيواله پرمختيايي اداره ورکوي.

د خوست د ګربزو ولسوالۍ اوسېدونکې سپين سرې کونډې مور ورېښمينې چې يادې ټولنې د چرګانو فارم ورته جوړ کړی، له پژواک اژانس سره دا ډول مرستې تر يوه بريده اغېزناکې وبللې.

هغه د يادې ولسوالۍ په شيخانوکلي کې له خپلو دريو يتيمو بچيانو سره يو ځای په يوه پخواني جوړ شوي خټين کور کې ژوند کوي او وايي چې د ګټې وټې څوک نه لري.

مېرمن ورېښمينې د خپل کور د انګړ په يوه کونج کې له خامو خښتو څخه په يوه کوچنۍ جوړه شوې خونه کې مرسته شوي چرګان ساتي او د تېښتې د مخنيوي لپاره يې ترې اوسپنيزه جالي راتاو کړې.

هغې د دغه فارم په اړه پژواک اژانس ته وويل: ((ټولې ۹۰ چرګې او ۱۰ چرګان دي. اته بوجۍ خوراکه يې هم راکړې ده. د ناروغۍ درملنه يې هم موسسه کوي. د ورځې دوه وخته خوراک ورکوم.))

هغې وويل چې که څه هم تر يوه بريده يې کورنۍ اقتصادي ستونزې پرې هوارېږي، خو له نورو خيريه سازمانونو غوښتنه کوي چې له اړمنو ښځو سره د ستونزو په بنسټيز هواري کې مرسته وکړي.

د خوست د تڼيو ولسوالۍ اوسېدونکې ګل زري، چې خپل خاوند يې ډېر کلونه مخکې له لاسه ورکړی، د چرګانو د فارم پرځای له غوا او وزو څخه د ساتنې او پالنې زده کړه ورکړل شوې.

 هغې له پژواک اژانس سره په خبرو کې له ياد کار څخه خوښي وښوده، خو ويې ويل چې د کورنۍ اقتصادي ستونزې يې ډېرې دي او په پوره ډول ورته رسېده ګي نه شي کولای.

ګل زري وويل: ((مستې يې خرڅوو، خو د يوې يا دوو غواګانو مستې دومرې ډېرې ندي، چې ټول ستونزې پرې هوارې کړو. دولت او مرسته کوونکو موسسو غواړو، چې موږ غوندې ښځو ته ډېره پاملرنه وکړي.))

په عين وخت کې د خوست د ښځو شبکې مسوولې زيبا بارکزۍ هم له پژواک اژانس سره په خبرو کې د هغو ښځو اقتصادي وضعيت د اندېښنې وړ وباله چې د کورنيو سرپرستي پرغاړه لري.

هغې پر دولت نيوکه وکړه چې د کمزوري اقتصاد ښځو د ستونزو د هواري په برخه کې يې هيڅ بنسټيز کار او يا کوم اوږدمهاله پروګرامونه نه دي ترسره کړي.

په همدې ترڅ کې د خوست د ښځو چارو رياست مسوولينو بيا تل دا خبره کړې، چې د دوی رياست او وزارت له پاليسۍ جوړونې پرته نور صلاحيتونه نه لري.

غړي

You need to subscribe to view the full article. Please login or register a new account.

اړوند خبرونه

ټول سوداګري او اقتصاد