کندهار (پژواک، ١٠ سلواغه٩٤) : په کندهار کې په دې وروستيو کې په نشه يي توکو د روږدو کسانو شمېره ډېره شوې، خو د درملنې په برخه کې يې اسانتياوې ډېرې کمې دي.
د کندهار ولايت د ډنډ ولسوالۍ د معتادينو د درملنې مرکز د دې ولايت له هغو څو مرکزونو يو دى چې نن د سلواغې په ١٠مه يې ٧٠ تنه په نشه روږدي تر درې مياشتنۍ درملنې وروسته خپلو کورونو ته ولېږل.
د کندهار د امنيې قوماندانۍ وياند ضيا دراني پژواک خبري اژانس ته وويل، دا د کندهار او د يو شمېر نورو ولايتونو معتاد ځوانان وو چې د پوليسو له خوا په ښار کې تر نيول کېدو وروسته دغه مرکز ته د درملنې لپاره راوستل شوي وو.
ده زياته کړه، د دغو ٧٠ روږدو درملنه د دريو مياشتو په موده کې شوې، چې نن تر رغېدو وروسته خپلو کورنيو ته ستانه کړاى شول.
درانى وايي، شاوخوا درې کلونه کېږي چې په نشه د روږدو د درملنې دغه مرکز د کندهار د امنيې قوماندانۍ له خوا په ډنډ ولسوالۍ کې جوړ شوى او تر دې مهاله يې د شاوخوا ٣٠٠٠ روږدو کسانو درملنه کړې ده.
د ده په خبره، د امنيې قوماندانۍ اړوند له نشه يي توکو سره د مبارزې پوليس په ښار کې روږدي ټولوي او بيا يې دغه مرکز ته د درملنې لپاره بيايي، خو د دې تر څنګ په دې وروستيو کې په خپله کورنۍ هم په نشو اخته کسان دغه مرکز ته د درملنې لپاره ورولي.
دى وايي، همدا اوس هم د ٧٠ په شاوخوا کې نور نشه يان تر درملنې لاندې دي، څو له نشو عادي ژوند ته را وګرځول شي.
نور محمد هغه ٣٥ کلن نشه يي دى چې د متعادينو په دې مرکز کې يې درملنه شوې ده.
ده پژواک اژانس ته وويل، د کورنۍ د اقتصادي ستونزو له امله يې نشو ته مخه کړه، خو نشو دى د خپلې کورنۍ د اوږو بار وګرځاوه.
دى وايي، دوه ځله يې په نورو مرکزونو کې هم درملنه کړې، خو دا ځل يې کلک هوډ کړى چې نشې به پرېږدي او عادي ژوند به پيلوي.
د نشه يي توکو د کر او قاچاق تر څنګ په نشه يي توکو روږدتيا د ټولنې لپاره جدي ګواښ دى چې د خلکو اندېښنې يې ډېرې کړې دي.
په کندهار کې له نشه يي توکو سره د مبارزې رييس ګل محمد شکران وايي، په تېرو کلونو کې په دې ولايت کې په نشه يي توکو د روږدو شمېره شاوخوا ١٠٠ زره تنه وه، خو سږ کال يې شمېر له ١٣٠ زره څخه لوړ شوى دى.
هغه زياته کړه: ((د عامې روغتيا رياست د شوې سروې له مخې، سږ کال په نشه يي توکو د روږدو وګړو شمېر له ١٣٠ زره تنو څخه زيات شوى چې ١٠ سلنه يې ښځې دي.))
په نشه يي توکو د روږدتيا لاملونه غربت، بې کاري، د پوهې ټيټه کچه، نشه يي توکو ته اسانه لاسرسى او نور ګڼل کېږي.
شکران دا هم وويل چې په دې وروستيو کې د ځوانانو تر منځ د چرسو څکول هم تر دې کچې عام شوي، چې ان کوم عيب هم نه ګڼل کېږي، دغه راز ګڼ شمېر تنکي ځوانان لومړى په نشه يي توکو روږد کېږي او وروسته بيا د همدې توکو پلور ته اړ کېږي.
نوموړى تر ټولو اندېښمنوونکى ټکى دا ګڼي چې د نشه يانو د شمېر ډېرېدو ته په کتو د هغوى د درملنې مرکزونه ډېر کم دي.
دى وايي، په ملي کچه بېړنيو اقداماتو ته اړتيا ده، څو هم د نشه يي توکو د کر او قاچاق پر وړاندې مبارزه وشي او هم د نشه يانو د درملنې مرکزونه ډېر شي.
دا مهال په کندهار کې د نشه يانو د درملنې څلور مرکزونه شته چې يو يې په ډنډ ولسوالۍ کې د امنيې قومندانۍ له خوا جوړ شوى او په اجباري توکه د نشه يانو درملنه کوي، دويم په سپين بولدک او پاتې دوه نور په کندهار ښار کې د ملالۍ او ودان په نومونو فعاليت لري.
بل خوا د کندهار د عامې روغتيا رياست مسوولين وايي چې مرکزي ادارې ته يې په کندهار کې د متعادينو د درملنې د يوه لوى او مجهز روغتون د جوړولو وړانديز کړى، چې منل شوى خو عملي کار يې لا نه دى پيل شوى.
دا مهال د کندهار نفوس شاوخوا ٢،٥ ميليونه تنو ته رسېږي چې له ١٣٠ زره څخه د زياتو نشه يانو شتون يوه غميزه ګڼل کېږي.
غړيYou need to subscribe to view the full article. Please login or register a new account.










