منځپانګې ته تلل
دوشنبه ۱۶ نومبر ۲۰۲۶ · کابل ۷:۱۰ غ.م
۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

ننګرهار کې ۷۰ ټنه تاريخ تېر درمل او خوراکي توکي وسوځول شول

· ۲ دقیقې لوستل · ۸۳ کتنې

جلال اباد (پژواک، د کب لومړۍ نېټه ۹۴): د ننګرهار د عامې روغتيا رياست هغه ۷۰ ټنه تاريخ تېر درمل او خوراکي توکي وسوځول چې د ګډ کمېسيون له لوري نيول شوي وو.

د ننګرهار د عامې روغتيا رييس ډاکتر نجيب الله کامه وال د کب په لومړی نېټه د بهسودو سراچې پله سيمه کې د دغو توکو د سوځولو پر مهال رسنيو ته وويل چې دا توکي يې په روان لمريز کال کې د ښار له هټيو ترلاسه کړي وو.

کامه وال وايي: ((۲۰ ټنه تاريخ تېر درمل او ۵۰ ټنه بې کيفيته او تاريخ تېر غذايي توکي د ګډ کمېسيون له لوري نيول شوي وو.))

د هغه په وينا، ننګرهار ته ۷۰ سلنه درمل د کابل له لاري راوړل کېږي؛ ځکه خو يې دوی ته په تړاو ډېر معلومات نه وي.

نوموړي زياته کړه: ((د کابل له لارې ننګرهار ته راتلونکي درمل موږ خپله نه چېک کوو چې پر څرنګوالي يې وپوهېږو، نو هيله ده چې پوليس یې په درونټه کې پلټنې وکړي.))

هغه وويل، د عامې روغتيا وزارت هڅه کوي چې د هېواد په کچه د درملو د چک لابراتور جوړ کړي او تر څنګ يې د درملو وارداتو يوازې څو کمپنيو ته ورکړي.

د عامې روغتيا رييس ګواښ وکړ چې ډېر ژر به په جلال اباد کې يو شمېر هغه خصوصي روغتونو جواز بېرته واخلي چې معياري خدمات نه شي وړاندې کولى، خو د يادو روغتونونو شمېر يې ونه ښود.

د جلال اباد ښار اوسېدونکي اميد شګيوال پژواک اژانس ته وويل چې تاريخ تېر درمل او غذايي مواد له قاچاقي لارو جلال اباد ته راوړل کېږي او پلورل کېږي.

د نوموړي په وينا: ((چې سيمه ييزې ادارې په ټنونو تاريخ تېر درمل نيسي؛ نو حتمي ده چې يوه زياته اندازه به يې پر ناروغانو هم پلورل شوي وي.))

هغه پر هټۍ والو او د درملتونونو پر خاوندانو غږ وکړ چې نه بايد تاريخ تېر توکي او درمل وپېري.

د ننګرهار د والي وياند عطاء الله خوږياني پژواک خبري اژانس ته وويل چې د ولايت مقام اړوند ادارو ته سپارښتنه کړې ځو د دغسې تاريخ تېرو توکو مخه ونيسي.

خوږياڼی زياتوي: ((والي صېب ټولو اړوند ادارو ته امر کړی چې ننګرهار ته راتلونکي درمل په ګمرګاتو کې چک شي او وروسته بازار ته وړاندې شي.))

د عامې روغتيا رياست د معلوماتو له مخې، تېر کال په ننګرهار ولايت کې ۲۰۰ ټنه تاريخ تېر درمل او غذايي مواد سوځول شوي دي.

غړي

You need to subscribe to view the full article. Please login or register a new account.

اړوند خبرونه

ټول روغتیا