کابل (پژواک، ١٠ ورى ٩٥): د هېواد د فوټبال ملي لوبډله نن د ٢٠١٨ نړيوال جام لومړنيو سياليو او د اسيا ملتونو د ٢٠١٩ جام سياليو په ترڅ کې نن له سنګاپور سره مخ کېږي.
ټاکل شوې چې دا سيالۍ به نن له غرمې وروسته شاوخوا درې بجې د ايران د پلازمينې تهران په ورزشي لوبغالي کې پيل شي چې د هېواد له ټلويزيونونو هم په ژوندۍ بڼه خپرېږي.
د افغانستان د ملي لوبډلې سر روزونکي پيتر شګرت وويل، که چېرته د هېواد ملي لوبډله په ننۍ لوبه کې سنګاپور مات کړي، نو ددې چانس لري چې د خپلې ډلې څلورمه درجه کې ځاي ونيسي.
هغه زياته کړه چې د افغانستان د ملي لوبډلې تېره لوبه سخته وه، د جاپان په څېر يوه ټېم نه د امتياز اخيستل څه اسان کار نه دى، خو افغان ملي لوبډله بايد په خپله نننۍ لوبه کې سنګاپور ته ماتې ورکړي، څو د ډلې د صعود چانس زيات شي، د سنګاپور لوبډله دې جدي وګڼل شي.
شګرت وويل: ((نه غواړم چې د سنګاپور پر وړاندې د لوبې پر تاکتيک خبرې وکړم، خو د ګټلو لپاره ميدان ته ورځو، د نن ورځې د لوبې حالت د اروپا د اتلانو ليګ لوبو ته ورته دى، ځکه چې موږ بايد خپل مقابل لورى د زياتو ګولونو په وهلو سره له مخې لرې کړو.))
د افغانستان د فوټبال ملي لوبډلې لوبډلمشر فيصل شايسته ويلي چې د هېواد د فوټبال ملي لوبډله هڅه کوي چې د جاپان پر وړاندې له ماتې کار واخلي او د سنګاپور سره د يوې ښې لوبې له لارې د افغانستان خلکو ته يو ځل بيا خوښي ډالۍ کړي او له ټولو ايران مېشتو افغانانو غواړي چې د ملي لوبغاړو د هڅونې لپاره لوبغالي ته ورشي.
د يادونې ده، افغانستان د اسيا د ٢٠١٨ کال د نړيوال جام مقدماتي سياليو کې په (E) ډله کې له سنګاپور، جاپان، کمبوډيا او سوريې سره مل دى.
غړيYou need to subscribe to view the full article. Please login or register a new account.










