پل علم(پژواک،١٥ليندۍ٩٥): د کار او ټولنيزو چارو وزيره وايي چې د لوګر يو شمېر معلولين به د مسلکي زده کړو په موخه هندوستان ته ولېږل شي.
دغه څرګندونې د کار ټولنيزو چارو، شهيدانو او معلولينو وزيرې نسرين اورياخېل د ليندۍ په ١٥مه د لوګر په مرکز پل علم کې د مسلکې زده کړو د يو مرکز د جوړونې د مراسمو په پيل کې وکړې.
اورياخېل وويل چې په تېرو دوه کلونو کې د هېواد په بېلابېلو برخو کې د مسلکي زده کړو ٣٠ مرکزونه جوړ شوي او پام کې ده چې په راتلونکي کال کې دغه شمېره نوره هم لوړه شي.
دې زياته کړه: (( اوس موږ ټول ٤٦ مرکزونه لرو خو غواړم چې دغه مرکزونه ٩٠ ته لوړ کړم.))
د هغې په وينا، د لوګر د معلولينو لپاره ځانګړې پاملرنه کوي او پام کې ده چې د دې ولايت يو شمېر معلولين د مسلکي زده کړو په موخه هندوستان ته ولېږل شي.
اورياخېل زياته کړه: (( ما په لوګر کې خپل رييس ته ويلي چې د دې کسانو اسناد او لېست ژر برابر کړي او ماته يې واستوي ترڅو نور کارونه ترسره کړو.))
دغه راز په ياده غونډه کې د لوګر والي محمد حليم فدايي وويل چې ياده ودانۍ د شلو ميلونو افغانيو په لګښت د يو کال په موده کې جوړيږي.
د هغه د معلوماتو له مخې، دغه ودانۍ په دوه پوړونو کې رغول کيږي چې د ١٩ خونو ترڅنګ به دوه لوى سالونونه هم ولري.
فدايي ټينګار وکړ چې په دې ولايت کې د شهيدانو کورنيو او معلولينو ته د حقوقو په ورکړه کې بايد هر ډول اسانتياوې رامنځته شي.
د هغه په وينا، دمګړۍ د لوګر نږدې ٧ زره ځوانان مسلکي زده کړو ته اړتيا لري چې بايد اسانتياوې ورته برابرې شي.
د يادونې ده چې تر دې وړاندې په لوګر کې دغه ډول مرکز شتون نه درلود او د لومړي ځل لپاره يې د بنسټ ډبره کېښودل شوه.
غړيYou need to subscribe to view the full article. Please login or register a new account.
