کندهار (پژواک ٢٣ ليندۍ ٩٥): د کندهار د پنجوايي، ژیړۍ، ارغنداب او میوند ولسواليو اوسېدونکو او قومي مشرانو له حکومت څخه وغوښتل چې په دې ولایت کې دې د اوبو د کمښت ستونزه هواره کړي.
هغوی د یادې شوې ستونزې د حل په موخه د دهلې بند د رغولو غوښتنه وکړه، ځکه اوسمهال د خلکو کښتونو او باغونو ته په کافي اندازه اوبه نه رسېږي.
دغه غوښتنه په هغې غونډه کې وشوه چې نن د ليندۍ په ۲۳ مه په پنجوایي ولسوالي کې له نظام څخه د ملاتړ په موخه جوړه شوې وه چې د دې ولسوالۍ په ګډون د ژیړې، ارغنداب او میوند ولسواليو قومي مشرانو او مخورو په کې ګډون کړی وو.
د غونډې ګډونوالو له حکومت څخه د ملاتړ ډاډ ورکړ، خو په دغو ولسوالیو کې یې د اوبو د کمښت د ستونزې د حلولو، ځوانانو ته د کار موندلو او پرمختیایي پروژو د پلي کولو غوښتنه وکړه.
د پنجوايي ولسوالۍ د پرمختيایي شورا مشر حاجي نېک محمد وویل، خلک د خپل نظام ملاتړي دي، خو له حکومت څخه د امنیت او پرمختیايي پروژو پلي کېدل غواړي.
هغه زیاته کړه، د دهلې بند د کندهار د اوو ولسوالیو د اوسېدونکو ځمکې او باغونه خړوبوي، خو اوس له رسوباتو ډک شوی او خلکو ته کافي اوبه نه رسېږي چې له امله یې د دې ولایت پر کرنه بده اغېزه کړې ده.
نوموړي له حکومت څخه وغوښتل چې د دهلې بند د دېوالونو د لوړولو پروژه پیل کړي چې ژمنه یې وار له مخه شوې ده.
نوموړي د دې تر څنګ غوښتنه وکړه چې که د کندهار ولسواليو ته پاملرنه ډېره شي، نو دا ولایت به د امنیت او اقتصاد په برخو کې پرمختګ وکړي.
د ژيړۍ ولسوالۍ قومي مشر حاجي صالح محمد بیا پر خلکو غږ وکړ، چې خپل اولادونه د ملي امنیتي ځواکونو په لیکو کې ودروي.
ده وویل، دلته هغه وخت ثبات راتلی شي چې خلک خپل اولادونه د وطن خادمان کړي، د ملي پولیسو، ملي اردو او ملي امنیت لیکي پیاوړي کړي.
نوموړي یادونه وکړه چې د خلکو او او دولت تر منځ د ښې همغږۍ له امله د کندهار ډېرې ولسوالۍ په نسبي توګه ارامې دي، خو حکومت ته په کار ده دلته ځوانانو ته کار پیدا کړي، حاصلاتو ته یې ښه بازار پیدا کړي، د اوبو سرچینې ډېرې شي او په بېلابېلو برخو کې له خلکو سره مرستې وشي.
دغه راز یو شمېر نورو قومي مشرانو بیا غوښتنه کوله چې په هېواد کې د دایمي امنیت او ثبات لپاره دې د حکومت او وسله والو تر منځ سوله وشي.
د پنجوايي ولسوال حاجي فضل محمد اسحاقزي وویل، په دې ولسوالۍ کې امنيت ښه دی او خلک له حکومت سره همکار دي.
ده پر خلکو غږ وکړ چې که غواړي په دې ولسوالۍ کې پرمختيايي پروژې پلي شي، نو خپل اولادونه دې د ملي اردو ليکو ته ولېږي.
په سوېل کې د حکومت د ملاتړ پروګرام استازي حلیم شملزي وویل، که خلک په کلکه د خپل حکومت تر شا ودرېږي، نو حکومت پياوړی کېږي او د راتلونکو نسلونو ژوند تضمينېږي.
د کندهار ولایت مقام مرستيال عبدالعلي شمسي وويل، ولایتي ادارې ته هڅه کړې چې بنسټیزو پروژو ته پاملرنه وکړي.
هغه زیاته کړه، تېر کال يې په پنجوايي، ژیړۍ او ميوند ولسواليو کې ډېرې پرمختيايي پروژې پیل کړي چې ځينې بشپړې شوي او د ځینو کارونه روان دي.
نوموړي په دې برخه کې په یادو شوو ولسوالیو کې له ۲۰ د ډېرو کانالونو جوړول، د باغونو اصلاح او نورو یادونه وکړه چې د خلکو په غوښتنه پلي شوي دي.
ده یادونه وکړه چې له تېر یوه کال راهسې په یو شمېر امنو ولسوالیو کې داوبو د بندونو او کانالونو د جوړولو هڅې کوي چې د بېلګې په توګه یې د ارغستان ولسوالۍ د اوبو د بند یادونه وکړه چې تدارکاتي چارې یې روانې دي.
هغه دغه راز خبر ورکړ چې د یادو شوو درېیو ولسواليو د اوسېدونکو لپاره په ژیړۍ ولسوالۍ کې د يوه (۳۰) بستریز روغتون د جوړولو چارې په پلان کې دي چې د قرارداد چارې یې بشپړې شوي او ډېر ژر به يې د جوړولو عملي چارې پیل شي.
ده ټینګار وکړ چې ولایتي اداره د خلکو غوښتنو او ستونزو ته پوره توجه کوي، خو د حکومت نیمګړتیاوې هغه مهال اصلاح کېدای شي چې خلک همکاري وکړي.
غړيYou need to subscribe to view the full article. Please login or register a new account.
