کابل (پژواک، ١١ سلواغه ٩٥): د افغان ستان د کرکټ پرمختيايي لوبډلې په دويمه يوه ورځنۍ لوبه کې هم د لومړۍ درجې هېواد زمبابوې الف لوبډلې ته ماتې ورکړه.
د افغانستان کرکټ بورډ وياند فريد هوتک د سلواغې په ١١مه، پژواک خبري اژانس ته وويل دا لوبه چې پرون د زمبابوې په پلازمېنه هرارې ښار کې ترسره شوه، پچه د زمبابوې الف لوبډلې وګټله او افغان پرمختيايي لوبډلې ته يې د توپ وهنې بلنه ورکړه.
هغه زياته کړه،افغان پرمختيايي لوبډلې د ۴۷،۳ اورونو په لوبولو او د ټولو لوبغاړو په سوځېدلو سره ۲۰۸ منډې جوړې کړې.
د افغانستان له لوري لوبډلمشر شفيق الله شفق ۵۰، عمران جنت ۴۹، ناصر خان ۲۸ او رحمان ګل ۲۸ منډې جوړې کړې.
هوتک وايي چې د باران له امله يادو لوبڅارانو زمبابوې ته په ٣١ اورونو کې د ١٨٢ منډو هدف ورکړ، خو د زمبابوې الف لوبډلې ياد هدف هم ترلاسه نه شو کړاى او د ټولو لوبغاړو په له لاسه ورکولو يې ١١٢٦ منډې جوړې کړې او دغه راز يې دا لوبه د ٥٥ منډو په توپير سره وبايلله.
د افغان پر مختيايي لوبډلې له لوري فضل نيازي ۳، ضياالرحمان اکبر، ضمير خا ن او شفيق الله شفق دوه دوه او عبدالله عادل يو لوبغاړی وسوځول .
شفيق الله شفق چې نيمه سليزه يې ووهله او د سيالې لوبډلې دوه لوبغاړي يې وسوځول، د لوبې غوره لوبغاړى اعلان شو.
د يادونې ده چې لومړۍ لوبه هم افغانستان ګټلې وه، د دواړو لوبډلو ترمنځ درېيمه لوبه به د کب په ١٢مه، ترسره شي.
غړيYou need to subscribe to view the full article. Please login or register a new account.










