منځپانګې ته تلل
دوشنبه ۱۶ نومبر ۲۰۲۶ · کابل ۵:۵۸ غ.م
۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

د کندهار زيړي ولسوالۍ کې ٣٠ بستريز روغتون جوړېږي

· ۳ دقیقې لوستل · ۱۰۴ کتنې

کندهار (پژواک، ١٤ کب ٩٥): د کندهار په ژیړۍ ولسوالۍ کې دوه پروژې پرانیستل شوې او د بلې د بنسټ ډبره کېښودل شوه.

لومړۍ پروژه د ژیړۍ ولسوالۍ د ودانۍ وه چې په دې وروستیو کې يې د جوړولو چارې بشپړې شوې وې او نن د کب په ۱۴مه پرانیستل شوه.

د دغې ودانې د پرانیستې په مراسمو کې د کندهار ولایت سرپرست عبد الحنان منیب، یو شمېر رییسانو، ولسوال او قومي مشرانو ګډون کړی و.

عبدالحنان منیب پژواک خبري اژانس ته وویل، د ژیړۍ ولسوالۍ د اداري چارو لپاره ودانۍ پر ۵ جریبه ځمکه د ۱۵ میلیونه افغانیو په لګښت جوړه شوې ده.

هغه زیاته کړه، ودانۍ په عصري بڼه جوړه شوې چې د اړتیا وړ ټول ملحقات لري.

د ده په خبره، تر دې وړاندې د ودانۍ د نشتوالي له امله مامورین او خلک د اداري چارو په برخه کې له ستونزو سره مخامخ وو چې اوسه دغه ستونزه حل شوه.

منیب یادونه وکړه، یاده شوې ودانې د کندهار د والي ډاکټر محمد همایون عزیزي د هغو هڅو په پایله کې جوړه شوې، چې غوښتل یې حکومتولي پیاوړې او خدمات پراخ شي.

دغه راز د دې ولسوالۍ د پاشمول کانال د بیارغونې چارې هم بشپړې شوې او پرانیستل شوه.

د دغه کانال پر بیارغونه ۱۳،۷ میلیونه افغانۍ لګښت راغلی چې ۱۹ کیلومتره اوږدوالی لري.

د دغه کانال د بیارغولو په چارو کې د اوبو کنټرولوونکې دروازې، استنادي دېوالونه، یو شمېر پولګوټي او نور شامل و.

د کندهار ولایت سرپرست وویل، دغه بیارغول شوی کانال د ۱۱۶۴ هکتاره ځمکې د خړوبولو وړتیا لري چې څه له پاسه ۳ زره کورنۍ به ورڅخه ګټه اخلي.

بل خوا، نن په همدې ولسوالۍ کې د یوه ۳۰ بستریز روغتون د بنسټ ډبره هم کېښودل شوه، چې له ډېرې مودې راهیسې یې د ولسوالۍ اوسېدونکو غوښتنه کوله.

د کندهار ولایت سرپرست وویل، دغه ۳۰ بستریز روغتون پر ۲۰ جریبه ځمکه د ۳۰ میلیونه افغانیو په لګښت جوړېږي.

ده زیاته کړه، د روغتون د جوړولو لګښت د هندوستان له خوا ورکول کېږي.

د کندهار د عامې روغتیا رییس ډاکټر عبدالرشيد الکوزي پژواک اژانس ته وویل، د روغتون ودانۍ به د یوه کال په موده کې جوړه شي چې د ۳۴ خونو په لرلو به نسايي ولادي، د کتلوي معافیت او نورې څانګې ولري او خلکو ته به لومړني روغتیايي خدمات وړاندې کوي.

ده دا هم وویل چې د عامې روغتیا ریاست به هڅه وکړي، د ژیړۍ تر څنګ په نورو ولسوالیو کې هم روغتیايي خدمات ډېر او معیاري کړي.

د ژیړۍ ولسوال او خلکو خوښي وښودله چې دغلته یو شمېر پروژې پرانیستل شوې او د بلې کار پیل شو.

د ژیړۍ د پاشمول سیمې اوسېدونکي عبدالقیوم پژواک اژانس ته وویل، دغه ولسوالۍ د کندهار له مهمو ولسوالیو ده، خو له دې مخکې یې د اداري چارو لپاره مناسبه ودانۍ نه لرله، چې په جوړېدو سره به یې دغلته د حکومتولۍ چارې معیاري او سمې شي.

هغه دغه راز خوښي وښودله چې دغلته یو ۳۰ بستریز روغتون جوړېږي، د ده په خبره خلک اړ وو چې خپل ډېر عادي ناروغان هم د درملنې لپاره کندهار ښار ته یوسي.

د یادونې ده چې د کندهار ګڼې لیرې پرتې ولسوالۍ نه خو د اداري چارو لپاره سمې ودانۍ لري او نه هم خلکو ته په کې د اړتیا وړ خدمات وړاندې کېږي.

د ولایتي ادارې چارواکی وايي، په پام کې ده په نوي لمریز کال کې به په ورته توګه په درېیو نورو ولسوالیو کې هم د اداري چارو لپاره ودانۍ جوړې شي.

غړي

You need to subscribe to view the full article. Please login or register a new account.

اړوند خبرونه

ټول روغتیا