کابل (پژواک، ٧ سلواغه ٩٦): د عامې روغتيا وزارت اعلان کړى چې د روټا واکسين يې د واکسيناسيون ملي پروګرام ته داخل کړى او ماشومانو ته په وړيا ډول ورکول کېږي.
ډاکټران وايي چې روټا واکسين د اخته کس د غايطه موادو په وسيله په چاپېريال کې خورېږي او د خوراکي توکو، څښاک اوبو، لاسونو او ککړو وسايلو او بیا د خولې له لارې د انسان وجود ته ځي او د نس ناستي سبب ګرځي.
د عامې روغتيا وزارت وياند ډاکتر فيروز الدين فيروز نن په کابل کې يوې خبري ناستې ته وويل چې د دغه واکسينو تطبيق نن پيل شوی دی.
د هغه په خبره، روټا واکسين د څاڅکو په ډول ماشومانو ته په دوو دورو (شپږمه اوونۍ او لسمه اوونۍ) کې په وړيا ډول ورکول کېږي او ځاني عوارض نه لري.
وزير زياته کړه چې د دغه واکسينو په عملي کولو سره ماشومان د روټا له ويروس څخه د پيدا شوي نس ناستي ناروغي پر وړاندې وقايه کېږي.
فيروز وويل: ((له پنځو کلونو ټيټ عمر لرونکي شاوخوا ٣٠ سلنه ماشومان چې د نس ناستي په سبب چې عمده برخه يې روټا جوړوي، مړه کېږي، مخنيوى يې کوو.))
د هغه په خبره، هر کال يو ميليون ماشومان د نس ناستي پر ناروغۍ اخته کېږي.
د هغه د معلوماتو له مخې، هر دوه واکسين ٢.١٩ډالر کېږي چې ٢٠ سنټه يې افغان دولت او پاتې يې د روغتيا نړيوال سازمان WHO او د ماشومانو لپاره د ملګرو ملتونو وجهي صندوق يا يونيسف او د واکسينو نړيوال ايتلاف GAVI ورکوي.
په افغانستان کې د روغتيا نړيوال سازمان استازي ريچارډ ريک په نننۍ ناسته کې وويل چې د نس ناستي ناروغي په ماشومانو کې وژونکي ناروغي ده او هر کال د نړۍ په کچه د ٥٠٠ زره تر پنځه کلنۍ ټيټ عمر لرونکو ماشومانو د مرګ لامل ګرځي.
هغه وايي چې افغانستان هم يو له هغو هېوادونو دى چې پر دې ناروغۍ د اخته ناروغانو کچه په کې لوړه ده.
نوموړي زياته کړه چې د روغتيا نړيوال سازمان د افغانستان له عامې روغتيا وزارت سره خپلو مرستو ته دوام ورکوي.
د يونيسف ادارې استازي اديلا خودرو د افغانستان واکسيناسيون ملي پروګرام کې د روټا واکسين شاملول يو مهم اقدام وباله او وويل چې اداره يې له افغانستان سره په روغتيايي برخو کې خپلو مرستو ته دوام ورکوي.
تر اوسه پورې د توبرکلوز، ماشومانو پوليو، ديفتري، تور ټوخي، د نوو زېږېدلو ټيټانوس، تور زړي، انفونزا (ب)، سينه بغل او سرخانو واکسين تر پنځه کلونو لاندې ماشومانو ته تطبيق شوي دي.
غړيYou need to subscribe to view the full article. Please login or register a new account.










