خوست ښار (پژواک، ۱۲ کب ۹۶): د خوست يو شمېر قومي مشرانو او ځوانانو د استيناف محکمې د هغې پرېکړې په غبرګون کې لاريون وکړ چې له مخې يې د دغه ولايت د ولايتي شورا مرستيال پر يوه مياشت تنفيذي بند محکوم کړی.
دغو قومي مشرانو او ځوانانو چې شمېر يې لسګونه کسانو ته رسېده د کب په ١٢مه خوست د ولايتي شورا د دفتر مخې ته راټول شوي وو او د ولايتي شورا د بندي شوي غړي د راخلاصون غوښتنه يې کوله.
د ځينو سرچينو د معلوماتو له مخې، د ولايتي شورا مرستيال قديم افغان د تېرې پنجشنبې په ورځ له دې امله پر يوه مياشت تنفيذي بند محکوم شو چې د استيناف محکمې له يوه قاضي سره يې لفظي شخړه کړې وه.
د خوست ولایتي شورا رييس کفيل ريحان بيا پژواک خبري اژانس ته وويل چې قدیم افغان له قانوني دلایلو او مراحل طی کولو پرته بندي شوی او د محکمې دا پرېکړه دوی ته د منلو وړ نه ده.
هغه زياته کړه، اړوندو ادارو پرته له دې چې د قضیې په اړه دوی ته قانوني خبر ورکړي، پر خپل سر يې تصمیم نیولی او د شورا مرستیال یې بندي کړی دی.
په همدې حال کې د ولايتي شورا مخې ته راټول شوي قومي مشران او ځوانان هم د محکمې دا پرېکړه غير عادلانه بولي او وايي چې دا په حقيقت کې د دغه ولايت ولسونو ته سپکاوی دی.
پژواک هڅه وکړه چې په دې اړه د خوست استيناف محکمې د مسوولينو نظر هم له ځان سره ولري، خو هغوی په دې خبره چې سترې محکمې ورته اجازه نه ده کړې، خبرو کولو ته حاضر نه شول.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن