منځپانګې ته تلل
دوشنبه ۱۶ نومبر ۲۰۲۶ · کابل ۵:۲۴ غ.م
۱° — په ټولو ولایتونو کې هوا
صاف · ↑۱۴° ↓۰°
د هوا کیفیت: منځنی
غړي

په هېواد کې د ماشومانو د ګوزڼ واکسين پسرلنی کمپاين پيل شو

· ۳ دقیقې لوستل · ۷۶ کتنې

کابل(پژواک،۲۱کب۹۶): په ټول هېواد کې د ماشومانو د ګوزڼ واکسين پسرلنی کمپاين په پيلېدو سره هممهاله، عامې روغتيا وزارت په ځينو ولايتونو کې د پوليو ويروس د شتون له امله اندېښه په ډاګه کړه.

د عامې روغتيا وزارت مرستيال ډاکټر فدا محمد پيکان نن په کابل کې د ماشومانو د ګوزڼ واکسين د پسرلني کمپاين د پرانيستې په مراسمو کې وويل چې ددغه څلور ورځني کمپاين لومړی پړاو دهېواد په ۳۲۴ولسواليو کې کور په کور تطبيقېږي.

د نوموړي په وينا، په د ې پړاو کې کابو ۹.۹ميليون ماشومانو ته د پوليو دوه دوه څاڅکي واکسين او د ۶مياشتو څخه تر پنځو کالنو ۸.۹ميليون ماشومانو ته د ويټامين اې (A) کپسول ورکول کېږي.

ډاکټر پيکان وويل چې دغه پروګرام د ۶۸زره رضاکارانو له خوا پرمخ وړل کېږي او دغه کسان به په خپلو سيمو کې کور په کور ګرځي څو ماشومانو ته واکسين ورکړي.

د عامې روغتيا وزارت مرستيال د جوماتونو له  امامانو، سيمه ييزو مخورو او دغه راز ځوانانو او رسنيو څخه وغوښتل چې د عامې روغتيا وزارت سره دې ددغه پروګرام په عملي کېدو کې همکاري وکړي.

هغه وويل چې په ځينو ولايتونو کې د سړې هوا له  امله، په دې پړاو کې ۴۱سړې ولسوالۍ تر پوښښ لاندې نه نيول کېږي او په دغو ولسواليو کې به يوه مياشت وروسته د واکسين پروګرام عملي شي.

ډاکټر پيکان زياته کړه:" د پوليو ويروس اوس په ډېرو کمو سيمو کې شتون لري او د هېواد ۹۸سلنه سيمې ددغه ويروس څخه پاکې دي او موږ هيله لرو چې نور د ماشومانو د ګوزڼ شاهدان و نه اوسو."

د عامې روغتيا وزارت د معلوماتو له مخې، د روان ۲۰۱۸زېږديز کال له پيل څخه تر اوسه پورې، درې مثبتې پېښې( يوه په ننګرهار او دوې په کندهار کې) ثبت شوې دي.

په افغانستان کې د روغتيا د نړيوال سازمان د استازي مرستيال ريچارډ پيټا چيک ويدډز په دې مراسمو کې وويل چې د ماشومانو د ګوزڼ واکسين پسرلنی کمپاين، يوه موکه ده چې په ځينو سيمو کې يې ويروس هماغه راز شتون لري، له منځه يوړل شي.

هغه وويل:" اوسمهال په افغانستان، پاکستان او نايجريا هېوادونو کې د ګوزڼ پر ناروغۍ اخته کسان شتون لري او نړيواله ټولنه هڅه کوي چې دغه ناروغي د مسوولو ارګانونو په همکارۍ سره له منځه يوسي، خو اړينه ده چې په دې برخه کې په ټولو کچو يوه واکمنه ژمنه شتون ولري."

په افغانستان کې د يونيسف (له ماشومانو څخه د ملګرو ملتونو د ملاتړ صندوق) استازي اډل خضر Adele Khodr) وويل:" موږ هېڅکله هم تر دې کچې د ګوزڼ له منځه تلو ته نه يو نږدې شوي او زه د افغانستان له ټولو والدينو څخه غواړم چې د روانې اوونۍ په اوږدو کې دې خپل ماشومان واکسين کړي."

هغه زياته کړه:"موږ هيله لرو چې افغانستان ژر تر ژره له دې وژونکي ويروس څخه وژغورل شي او نړۍ ته، له پوليو ويروس څخه يو پاک هېواد ډالۍ کړي."

د ماشومانو ګوزڼ، يوه ويروسي ناروغي ده چې پر اعصابو اغېزه کوي او د بدن د بشپړ يا يوې برخې د فلج او ان د مړينې لامل کېدای شي.

غړي

You need to subscribe to view the full article. Please login or register a new account.

اړوند خبرونه

ټول روغتیا