منځپانګې ته تلل
دوشنبه ۱۶ نومبر ۲۰۲۶ · کابل ۵:۲۳ غ.م
۱° — په ټولو ولایتونو کې هوا
صاف · ↑۱۴° ↓۰°
د هوا کیفیت: منځنی
غړي

د هلمند د پرلت شپږ اعتصاب کوونکي روغتون ته لېږدول شوي

· ۲ دقیقې لوستل · ۵۵ کتنې

لښکرګاه (پژواک، ١١ ورى ٩٧): د هلمند په مرکز لښکرګاه کې د پرلت خېمې د اعتصاب کوونکو له ډلې شپږ تنه يې د ناوړه روغتيايي حالت له امله روغتون ته لېږدول شوي دي.

د وري مياشتې په درېيمه په لښکرګاه کې د غازي محمد ايوب خان لوبغالي ته څېرمه ځانمرګی بريد وشو چې له امله يې لسګونو کسانو ته مرګ ژوبله واوښته.

د همدې ورځې په سبا يو شمېر ځوانانو په دغه سيمه کې د سولې د راتګ په موخه خېمه ودروله چې په تعقيب يې بلې ورځې ته ښځو هم دغه کار وکړ.

خو د تېرې پنجشنبې په ورځ يو شمېر کسانو په دې خېمه کې لاس د نه خوړو پر اعتصاب پورې کړ.

د اعتصاب کوونکو له ډلې پاچا خان نن (د وري ١١مه) پژواک خبري اژانس ته وويل چې د سولې د راتګ په  برخه کې تر اوسه حکومت او طالبانو دوى ته مثبت ځواب نه دى ورکړى.

هغه وايي: ((زموږ يو شمېر کسانو پر اعتصاب لاس پورې کړى چې د هغوى هم ٤٠ ساعته پوره شول، بېګاه د شپږو کسانو وضعيت خراب شو چې شفاخانې ته يې وړي دي.))

دغه راز د دغو کسانو له ډلې اقبال خيبر پژواک ته وويل چې ٣٠ کسانو تر اوسه د نه خوړو اعتصاب کړى چې شپږ يې تر اوسه روغتون ته لېږدول شوي دي.

هغه وايي: ((موږ خپلې مبارزې ته ادامه ورکوو، دغه حرکت به نور هم قوي کېږي.))

يو تن اعتصاب کوونکي سردارمحمد پژواک ته وويل: ((ماته يې اوس سيروم لګولى دى، زه دې په دې خېمه کې مړ شم خو سوله دې راشي.))

ده له خلکو غوښتنه وکړه چې د سولې د راتګ په دغه حرکت کې دې له دوى سره ونډه واخلي.

د بُست روغتون مسوولين وايي چې څلور اعتصاب کوونکي تېره شپه او دوه تنه نن ور وړل شوي دي.

د هغوى په وينا، له يادو کسانو د څلورو تنو روغتيايي وضعيت ښه نه دى.

بل لور ته د هلمند د مدني ټولنو غړو هم له دغه حرکت څخه ملاتړ وکړ او له حکومت او طالبانو يې غوښتنه وکړه چې جګړه بنده کړي او سوله وکړي.

د مدنې ټولنې په استازيتوب نظرمحمد رودي وويل چې د مدني ټولنې غړي د سولې په برخه کې د دې ځوانانو له حرکت څخه ملاتړ کوي.

هغه وايي: ((د خلکو زور د خداى زور دى، که چېرې موږ يو لاس شو دغه سوله راوستی شو.))

د اړوندې موضوع په اړه د هلمند د والي وياند عمر ځواک پژواک ته وويل چې حکومت د سولې خېمې د دروونکي ټولې غوښتنې مني خو چې طالبان هم بايد ومني.

غړي

You need to subscribe to view the full article. Please login or register a new account.

اړوند خبرونه

ټول روغتیا