په ګيان ولسوالۍ کې پنځه پوليس وژل شوي

ښرنه(پژواک،٢٩غبرګولى٩٧): د پکتيکا په ګيان ولسوالۍ کې د وسله والو طالبانو د بريد له امله پنځه پوليس وژل شوي او يوشمېر نور ټپيان دي.

د پکتيکا په ګيان ولسوالۍ کې يوې حکومتي سرچينې د غبرګولي په ٢٩مه پژواک خبري اژانس ته وويل چې تېره شپه وسله والو طالبانو د دې ولسوالۍ پر پوستو بريدونه کړي دي.

هغه وايي چې په دې بريدونو کې پنځه پوليس وژل شوي او يو شمېر نور ټپيان دي.

خو بل لورته د پکتيکا د امنيې قوماندانۍ وياند شاه محمود ارين پژواک ته وويل چې طالبانو تېره شپه د ګيان ترڅنګ د زيړوک او نکې ولسواليو پر پوستو هم بريدونه کړي دي.

ارين په دې جګړو کې د پوليسو او نورو امنيتي ځواکونو وژل کېدل رد کړل او ويې ويل چې د طالبانو بريدونه په شا تمبول شوي چې په ترڅ کې يې يو طالب وژل شوى او دوه نور ټپيان دي.

د يادو جګړو په اړه طالبانو تر اوسه څه نه دي ويلي.

خو بل لورته د دې ډلې وياند ذبيح الله مجاهد په خپله ټويټر پاڼه کې ليکلي چې د پکتيکا په جاني خېلو ولسوالۍ کې ١٦ امنيتي سرتېري له دوى سره يوځاى شوي دي.

مجاهد د دې کسانو نومونه هم ليکلي دي.

خو د پکتيکا امنيتي چارواکي بيا دغه څرګندونې ردوي او وايي چې دا يواځې د طالبانو پروپاګنډ دى.

د يادونې ده چې له کوچني اختر وروسته يو ځل بيا د وسله والو طالبانو بريدونو زور اخيستى چې له امله يې افغان امنيتي ځواکونو ته درنه مرګ ژوبله اوښتې ده.

غړي

You need to subscribe to view the full article. Please login or register a new account.