ګردېز- پل علم (پژواک، ٢٦ چنګاښ ٩٧): په پکتيا او لوګر ولايتونو کې د افغان امنيتي ځواکونو او طالبانو تر منځ جګړه کې ١١ امنيتي سرتېري او ٣٣ طالبان وژل شوي دي.
د پکتيا د امنيتي ارګانونو د همغږي قوماندان ډګروال اسدالله حليمي د چنګاښ په ٢٦مه پژواک خبري اژانس ته وويل چې تېره شپه طالبانو د زرمت ولسوالۍ په زاو سيمه کې د امنيتي ځواکونو پر يوې پوستې بريد کړى دى.
د نوموړي د معلوماتو له مخې، په دغه بريد کې ١١ امنيتي سرتېري وژل شوي او لس نور ټپيان دي.
حليمي وايي چې پر پوسته ډله ییز برید وشو او د رامنځته شوې نښتې په پایله کې ۱۹ طالبان هم وژل شوي او ۱۴ نور ټپيان دي.
ده زياته کړه: ((په دې پوسته کې د نظم عامه او ملي اردو سربازان وو چې درې د عامه نظم او اته د ملي اردو سربازان په کې شهيدان شوي او لس نور ټپيان شوي. د پوستې د سرتېرو د قوي دفاع او وروسته د مرستې له ورسېدو سره طالبانو ته هم زياته تلفات اوښتي.))
د زرمت ولسوالۍ يوه افسر چې نه غواړي نوم يې واخيستل شي، پژواک ته وويل چې لسګونو وسله والو پر دې پوستې بريد کړی و.
دی وايي: ((هو دغه شهيدان او ټپيان لرو او طالبانو ته هم زيات تلفات اوښتي، د مړو وړلو لپاره يو فيلډر څو واره راغی، ډک يې کړ او وړل يې. د يو کس مړی يې اوس همدلته پاتې دی.))
دغه راز د پکتيا د امنيې قوماندانۍ چارواکې وايي چې تېره شپه بهرنيو ځواکونو د يو هوايي بريد په ترڅ کې د يادې ولسوالۍ په دولتزيو سيمه کې څلور وسله وال طالبان وژلي دي.
د قومانداني وياند سردار ولي تبسم پژواک ته وويل چې بريد پر هغه پيکپ موټر شوی چې وسله وال په کې سپاره وو.
بل لور ته طالبان هم د زرمت ولسوالۍ د زاو جګړه تاييدوي.
د دې ډلې وياند ذبيح الله مجاهد وايي چې په ياده جګړه کې طالبانو د امنيتي ځواکونو يوه پوسته نيولې چې په ترڅ کې یې اته امنيتي سرتېري وژل شوي دي.
دغه راز د يو بل خبر له مخې، په لوګر کې د ملي امنيت صفر يو قطعې پر وسله والو طالبانو هوايي او ځمکني عمليات کړي دي.
د لوګر د امنيې قوماندانۍ وياند شاپور احمدزی وايي چې دغه عمليات د مرکز پل علم په دادوخېلو سيمه کې شوي دي.
ده پژواک ته وويل چې په دغو عملياتو کې ١٤ وسله وال طالبان وژل شوي او د يوه قوماندان په ګډون نهه تنه نور نيول شوي دي.
د احمدزي په خبره، په دغو عملياتو امنيتي ځواکونو ته مرګ ژوبله نه ده اوښتې.
بل لور ته د سيمې يوه اوسېدونکي صابر پژواک ته وويل: ((يوولس بجې وې چې جنګ شروع شو، تر سهار څلورو پورې يې دوام وکړ، تر کومه ځايه چې زه خبر يم په دې جنګ کې لس طالبان وژل شوي او درې نور زخميان شوي دي.))
بلخوا طالبان هم دغه جګړه تاييدوي.
د دې ډلې وياند ذبيح الله مجاهد وايي چې تېره شپه په لوګر کې د طالبانو او حکومتي ځواکونو تر منځ جګړه شوې ده.
هغه وايي چې په دې جګړه کې ١٣ سرتېري وژل شوي او ګڼ شمېر نور ټپيان شوي دي.
غړيYou need to subscribe to view the full article. Please login or register a new account.
