کابل (پژواک، ٢٨ تله ٩٧) : د افغانستان کرکټ غوره ليګ سياليو لومړۍ نيمه پاى لوبه کې بلخ ننګرهار ته ستره ماتې ورکړه.
د يادو سياليو نيمه پاى لوبې ته ننګرهار، بلخ، کابل او پکتيا لوبډلو لاره موندلې او د کندهار لوبډله له دې سياليو څخه بهر شوې ده.
د نيمې پاى لوبې پچه د بلخ لوبډلمشر محمد نبي وګټله او لومړۍ يې د توپوهنې پرېکړه وکړه.
دبلخ لوبـډلې ټولو لوبغاړو ښه توپوهنه وکړه او په ټاکل شويو ٢٠ اورونو کې يې د څلورو لوبغاړو په سوځېدلو سره ٢٣٥ منډې وکړې او ننګرهار ته يې د٢٣٦ منډو غټ هدف ورکړ.
د بلخ له لوري درويش رسولي ٧٨، کريس ګيل ٥٤، محمد نبي ٤٧ او مونرو د پام وړ ٣٣ منډې جوړې کړې.
د ننګرهار لوبډله ياد هدف ترلاسه نه شو کړاى ، ټوله لوبډله يې په ٦٤ منډو وسوځېدله او دغه راز د بلخ لوبډلې دا لوبه د ١٧١ منډو په توپير سره وګټله.
د بلخ لوري محمد نبي څلور، قيس احمد درې او ميرويس اشرف دوه لوبغاړي وسوځول.
محمد نبي ددې لوبې غوره لوبغاړى وټاکل شو.
دويمه نيمه پاى لوبه نن د پکتيا او کابل ترمنځ ترسره کېږي.
login or register a new account.
