کندهار (پژواک، ۱۴ لړم ۹۷): چارواکي وايي چې په ځينو سیمو کې د وسله والو له خوا پر واکسین بندیز لامل شوی چې په سوېل کې د ماشومانو د ګوزڼ په پېښو کې ډېروالی راشي.
په کندهار کې په روان کال کې د ماشومانو د ګوزڼ یا پولیو ۹ پېښې ثبت شوي چې له همدې امله دغه ولایت د ټولې نړۍ په کچه د پولیو تر ټولو خطرناکه سیمه ګڼل شوې ده.
په دې اړه نن په لایت مقام کې غونډه جوړه شوې وه چې په کې د کندهار مرستيال او سرپرست والي عبدالحنان منيب، د عامې روغتيا وزارت سلاکار هدايت الله ستانکزي او ورسره راغلي پلاوي، د ولايتي شورا غړو، قومي مشرانو، د يو شمېر مرستندويه ادارو استازو او نورو ګډون کړی وو.
غونډې ته د کندهار د عامې روغتیا رییس ډاکټر عبدالقیوم پخلا وویل، په دې ولایت کې په روان کال کې د ماشومانو د ګوزڼ ۹ پېښې ثبت شوي او د لا ډېرېدو احتمال یې شته.
هغه زیاته کړه، په کندهار او سوېلي زون کې د پولو د پېښو د ډېرېدو عمده لامل په ځینو سیمو کې د وسله والو مخالفینو له خوا د واکسیناسیون پر کمپاین بندیز دی.
ده له قومي مشرانو وغوښتل چې له روغتیايي ډلو سره د واکسین په پلي کېدو کې مرسته وکړي.
مرستيال او سرپرست والي عبدالحنان منيب وويل، پوليو خطرناکه ناروغي ده چې پر وړاندې یې مبارزه د ټولو ملي مسوولیت دی.
هغه زیاته کړه، د دغې خطرناکې ناروغۍ پر وړاندې د مبارزې په ستراتیژي کې باید بدلون راشي او د عامه پوهاوي په برخه کې دې ډېر کار وشي.
د عامې روغتيا وزارت سلاکار هدايت الله ستانکزي وويل،د پوليو د مخنيوي یوازینۍ لار واکسين دی او بايد ټول په ګډه دغه رسالت په سمه توګه تر سره کړو، څو خپل ماشومان له دغې خطرناکې ناروغۍ وژغورو.
چارواکو په ګډه نن په کندهار کې د پولیو د واکسین ۵ ورځنی کمپاین هم پیل کړ چې تر راتلونکې جمعې پورې به دوام ولري.
هغوی په دې لړ کې پر وسله والو غږ وکړ چې د پولیو د واکسین په پلي کېدو کې ورسره مرسته وکړي.
د کندهار په چاپېریال کې د پولیو فعال وایرس موجود دی چې له یوه ځایه بل ته لېږدي او د دغې ناروغۍ خطر یې ډېر کړی دی.
دغه راز د پولیو د پېښو د ډېروالي بل لامل د واکسیناسیون له کمپاینه د ۵ ولسوالیو پاتې کېدل دي.
شاولیکوټ، خاکرېز، غورک، میانشین او معروف هغه ولسوالۍ دي چې د بېلابېلو ستونزو له امله په کې د پولیو واکسین نه ترسره کېږي.
وسله وال طالبان غوښتنه کوي چې په دغو ولسوالیو کې دې د پولیو واکسین جومات په جومات تر سره شي، خو د عامې روغتیا وزارت پالیسي دا ده چې د واکسین کمپاین باید کور په کور تر سره شي.
د همدې ستونزې له امله د دغو ولسوالیو له ۱۰۰ زرو ډېرو ماشومانو ته واکسین نه رسېږي.
چارواکي ځينې نورې ستونزې هم دغلته د پولیو د پېښو د ډېرېدو د لاملونو په توګه یادوي.
دوی وايي، د افغانستان او پاکستان تر منځ پراخ تګ راتګ هم یو لامل دی چې د پولیو ویروس له یوه ځایه بل ته ولېږدي.
د دې تر څنګ بله ستونزه د جګړو له امله د بې ځایه شوو کډوالو یاده کړه چې په کندهار کې مېشت شوي او کمزورې شخصي او محیطي حفظ الصحه یې د دغه ویروس خپرېدو ته زمینه برابره کړې ده.
دغه راز هغوی یادونه کوي چې لا هم په ټولنه کې د خلکو تر منځ ناسم باورونه، غلطې مفکورې او اوازې د دې لامل شوي چې ډېرې کورنۍ خپلو ماشومانو ته واکسین ور نه کړي.
چارواکي له دولتي کارکوونکو، وسله والو مخالفینو او خلکو غواړي چې په ګډه لاس سره ورکړي څو تر هر ماشوم پورې د پولیو واکسین ورسول شي او ژوند یې له خطر څخه وژغورل شي.
غړيYou need to subscribe to view the full article. Please login or register a new account.
