کابل (پژواک، ۲۰ سلواغه ۹۷): د ملي امنیت ریاست د داعش ډلې د جلب او جذب مسوول له نیولو خبر ورکړ او وايي چې سلګونه لوستي ځوانان د یاد کس له لوري دې ډلې ته جذب شوي او د ورانکارو بريدونو لپاره ننګرهار ولایت ته استول شوي دي.
د دې ریاست له لوري نن پژواک خبري اژانس ته په رالېږل شوې خبرپاڼه کې راغلي دي چې ابو عبیدالله متوکل، د ملي امنیت د ځانګړو ځواکونو د عملياتو په ترڅ کې د کابل ښار د پنځمې حوزې اړوند سیمه کې نیول شوی دی.
سرچینې کاږلي چې ابوعبیدالله متوکل په پوهنتون کې د ښوونکي او د شیخ محمدي (روحاني) جومات کې د خطیب ترڅنګ د داعش ډلې په لارښوونه، یادې ډلې ته د ځوانانو د جلب او جذب مسوولیت پر غاړه درلود.
د ملي امنیت ریاست د معلوماتو له مخې، تر دې دمه سلګونه لوستي ځوانان د ابوعبیدالله له لوري داعش ډلې ته جذب او ننګرهار ولایت ته استول شوي دي.
خبرپاڼه زیاتوي، د نوموړي ۱۶ زده کوونکي چې داعش ترهګرۍ ډلې سره يې همکاري درلوده، د ملي امنیت ریاست له لوري د کابل ښار له بېلابېلو سيمو څخه د ترهګرۍ او دولت ضد کړنو په تور نیول شوي دي او اعتراف يې کړی چې د ابوعبیدالله متوکل له لوري د داعش ډلې ته جذب شوي دي.
متوکل د اعتراف پرمهال ویلي چې نږدې دوه میاشتې وړاندې يې وراره اسدالله چې مستعار نوم یې عبدالغفور و، په کابل ښار کې ځانمرګې برید ترسره کړ.
په خبرپاڼه کې د نوموړي د نیول کېدو وخت نه دی په ډاګه شوی.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن