پل علم (پژواک، ٢٩ کب ٩٧): د لوګر والي وايي چې د نوي امنيتي پلانونو او د مسوولينو د بدلون په پايله کې د دغه ولايت په مربوطاتو کې د کابل- ګردېز لويې لارې امنيت د پخوا په پرتله ډېر ښه شوى دى.
له دې مخکې څو ځلې پژواک د يادې لارې د نا امنۍ په اړه د خلکو شکايتونه خپاره کړي وو چې په پايله کې يې د دې لارې د امنيت د ټينګښت په موخه پوځي عمليات هم ترسره شول.
په دې اړه د لوګر والي محمد انور اسحاقزي د کب په ٢٩مه مرکز پل علم کې خبريالانو ته وويل چې په دې وروستيو د کابل- ګردېز لويې لارې د امنيت د ټينګښت په موخه يو لړ عمليات هم ترسره شول.
هغه وايي: ((د عملياتو تر څنګ مو ځيني مسوولين هم بدل کړل او منظم امنيتي پلانونه مو جوړ کړل چې اوس د دغه ولايت په مربوطاتو کې د کابل- ګردېز لويه لار امن ده.))
والي دا هم وويل چې د امنيتي مسوولينو ترمنځ همغږي او له امنيتي ځواکونو سره د خلکو همکاري په دغه ولايت کې د امنيت د ټينګښت لامل شوي دي.
دغه راز په دې غونډه کې د لوګر د ملي امنيت رييس جنرال امير جان ناصري وويل چې څه موده وړاندې د لوګر امنيتي وضعيت د اندېښنې وړ و او خلکو د لويو لارو د نا امنو په اړه شکايتونه درلودل.
هغه وايي: ((د همدې ستونزې د حل لپاره موږ ځيني هوايي او ځمکني عمليات وکړل چې له مخې يې اوس امنيت ډېر ښه شوى دى.))
ناصري د لوګر اوسېدونکو ته ډاډ ورکړ چې په راتلونکي کال کې به د دغه ولايت امنيت تر بل هر وخت ښه وي.
همدارنګه د لوګر د ولايتي شورا رييس حسيب الله ستانکزي وويل چې په دې وروستيو کې امنيت وضعيت ښه شوى دى.
نوموړي زياته کړه: ((خلک امنيت غواړي، موږ د خپلو امنيتي مسوولينو وروستي فعاليتونه ستايو خو غوښتنه مو دا ده چې دغه فعاليتونه بايد ډېر شي.))
بل لور ته د يادې لارې يوه موټر چلوونکي جمال هم پژواک ته وويل چې د کابل- ګردېز لارې امنيت د لوګر په مربوطاتو ښه شوى دى.
دى وايي: ((پخوا به موږ ډېر په تشويش له لوګر نه تېرېدو خو شاوخوا يوه مياشت کېږي چې کومه پېښه مو نه ده ليدلې او اوس په ډاډه زړه تېرېږو.))
د يادونې ده، د لوګر په مربوطاتو کې د کابل- ګردېز لويې لارې پر عمومي سړک کله ناکله د امنيتي ځواکونو او طالبانو ترمنځ جګړې کېږي چې بيا د څو ساعتونو لپاره دغه لار د ترافيکو پرمخ هم تړلې وي.
غړيYou need to subscribe to view the full article. Please login or register a new account.
