د سینیګال د کورنیو چارو وزارت وایي، د دغه هېواد سواحلو ته څېرمه د کډوالو د یوې کښتۍ ډوبېدو له امله لږ تر لږه ۲۱ کسان مړه شوي او یو کس ژوندی ژغورل شوی دی.
اسوشیټېډ پرېس خبري اژانس نن (یکشنبه) د سینیګال د کورنیو چارو وزارت په حواله راپور ورکړی چې دغه کښتۍ د پلازمېنې ډاکار شمال ته د کیبېمیر ښارګوټي سواحلو ته څېرمه ډوبه شوې ده.
د راپور له مخې، یاد وزارت پر اېکس پاڼه لیکلي چې د شنبې تر ماښامه د ۲۱ کسانو مړي موندل شوي او یو کس ژوندی ژغورل شوی دی.
سرچینې ویلي چې د نورو احتمالي ژوندي پاتې کسانو د موندلو لپاره د لټون او ژغورنې عملیات روان دي.
د سینیګال د کورنیو چارو وزارت نه دي ویلي چې په بېړۍ کې ټول څومره کسان سپاره وو.
د راپور له مخې، د لوېدیځې افریقا له سواحلو د هسپانیې د کانري ټاپوګانو پر لور د کډوالۍ سمندري لار د نړۍ له تر ټولو خطرناکو لارو څخه ده.
