کابل (پژواک، ٦ ورى ٩٨): د نړۍ تر ټولو شتمن کس او د پوليو واکسين ستر مالي ملاتړی بېل ګېټس وايي چې وسله وال طالبان د پوليو يا ګوزڼ واکسين د تطبيق پر وړاندې خنډونه جوړوي.
هغه زياته کړې، دوی هڅه کوي په ټوله نړۍ کې د پولیو پېښې صفر ته را ښکته کړي، خو په افغانستان او پاکستان کې لا هم د دې خطرناکې ناروغۍ ريښې شته دي.
د ده په خبره، طالبان د دغه واکسین د تطبیق په لار کې تر ټولو ستر خنډ دی او د دوی کارکوونکو ته اجازه نه ورکوي چې د پولیو ضد واکسین په کلیو او بانډو کې تطبیق کړي.
ګيټس چې د کمپيوټر د مشهورې کمپنۍ مايکروسافټ مشر هم دى، دا نه ده په ډاګه کړې چې په دقیقه توګه په کومو برخو کې دغه واکسین ته اجازه نه ورکول کېږي، خو وايي طالبان د پولیو ناروغۍ پر ضد هېڅ تګلاره نه لري، چېرته یې چې زړه وي اجازه ورکوي او چېرته یې چې خوښه نه وي د پولیو واکسیناتورانو مخه نیسي.
ده هیله څرګنده کړې چې وکړی شي په راتلونکو کلونو کې دغه ناروغي صفر ته راښکته شي.
پولیو تر ډېره د افغانستان په جنوب لوېدیځو ولایتونو کې لا هم موجوده ده او ماشومان فلجوي
د يادونې وړ ده، چې د افغانستان د کندهار ولايت د نړۍ په کچه د ماشومانو لپاره د ګوزڼ یا پولیو تر ټولو خطرناکه سیمه ګڼل کېږي.
په ۲۰۱۸ زېږدیز کال کې د پولیو تر ټولو ډېرې پېښې په همدې ولایت کې ثبت شوي او دغلته مېشت ماشومان هره شېبه د دغې خطرناکې ناروغۍ له ګواښ سره مخ دي.
د کندهار د عامې روغتیا ریاست چارواکي وايي، په ۲۰۱۸ زېږدیز کال کې د نړۍ په کچه د ماشومانو د ګوزڼ/پولیو ۲۸ پېښې ثبت شوي چې ۸ یې په پاکستان او ۲۰ یې په افغانستان کې وې.
login or register a new account.
