کندهار (پژواک، ۲۴ وری ۹۸): د کندهار په ډنډ ولسوالۍ کې د ناټو ځواکونو اړوند د قاطع ملاتړ ماموریت پر سرتېرو د سړک غاړې ماین چاودنه شوې او ٤ سرتېري یې ټپيان کړي دي.
پېښه نن تر غرمې وروسته هوايي ډګر ته څېرمه په میانجوی سیمه کې شوې ده.
د کندهار د والي ویاند عزیز احمد عزیزي پژواک خبري اژانس ته وویل، بهرني ځواکونه په دغه ساحه کې په ګزمه بوخت وو چې پر پوځي موټر یې د سړک غاړې ماین چاودنه کړې ده.
هغه زیاته کړه، په دې چاودنه کې موټر ویجاړ شوی او ۲ بهرني سرتېري ژوبل شوي دي.
په سوېل کې د ناټو د قاطع ماموریت مطبوعاتي دفتر هم د یوې خبرپاڼې په خپرولو ویلي چې په پېښه کې ۲ رومانیايي سرتېري ټپیان شوي دي.
خبرپاڼه کې ویل شوي، چاودنه د نړیوالو ځواکونو د ګزمې پر موټر شوې ده.
خو د رومانيا د دفاع وزارت اعلان کړى چې د کندهار په نننۍ پېښه کې د دوى څلور پوځيان ټپيان شوي دي.
وسله والو طالبانو د پېښې مسوولیت اخیستی دی.
د دې ډلې ویاند قاري یوسف احمدي وايي، کندهار هوايي ډګر ته څېرمه په یو کیلو مترۍ کې یې د امریکايي ځواکونو پر یوه زغره وال موټر د یوه خښ شوي ماین په وسیله چاودنه کړې چې موټر ویجاړ شوی او په کې سپاره سرتېري وژل شوي دي.
د یادونې ده چې د نړیوالو ځواکونو په چوکاټ کې رومانیايي سرتېري د کندهار نړیوال هوايي ډګر د امنیت چارې سمبالوي او هره ورځ په ډنډ او دامان ولسوالیو کې دغه هوايي ډګر ته څېرمه امنیتي ګزمې کوي.
غړيYou need to subscribe to view the full article. Please login or register a new account.
