کابل (پژواک، ۹ غبرګولی ۹۸): په کابل کې پولیس وايي چې د مارشال فهیم پوهنتون دروازې مخې ته د ځانمرګي برید له امله ۶ کسان وژل شوي او ١٦ نور ټپیان دي.
د کابل ښار د ۱۰۱ اسمايي زون ویاند فرامرز فردوس پژواک خبري اژانس ته وویل چې دا پېښه نن غرمه شاوخوا ۱۲ بجې د کابل ښار پنځمې امنیتي حوزې اړوند په قمبر څلورلاره کې رامنځته شوه.
سرچینې زیاته کړه چې ځانمرګي بریدګر د امنیتي ځواکونو له لوري تر پېژندنې وروسته ځان پورې تړلي چاودېدونکي توکي وچول.
د کابل امنیه قوماندانۍ ویاند په وینا، لومړۍ شمېرې ښيي چې په دې پېښه کې ۶ کسان وژل شوي او ١٦ نور ټپیان دي.
تر اوسه د دې پېښې مسوولیت کومې ډلې پر غاړه نه دی اخیستی.
