ښرنه (پژواک ۱۷ غبرګولى ٩٨): د پکتيکا د برمل ولسوالۍ اوسېدونکي وايي چې که پوهنې رياست يې ماشومانو ته په افغان خاوره کې د زده کړو زمينه برابره کړي، دوی چمتو دي چې پاکستان ته د زده کړو لپاره تلونکي سلګونه افغان زده کوونکي را وګرځوي.
دا په داسې حال کې د يادې ولسوالۍ اوسېدونکي پژواک سره دغه خبرې کوي، چې يوه مياشت وړاندې د پژواک موندنو وښوده چې د يادې ولسوالۍ تر ۶۰۰ زده کوونکي له فرضي کرښې هاخوا په پاکستانيو ښوونځيو کي په اردو ژبه زده کړې کوي او د هغه ځای شناختي کارتونه لري.
د برمل ولسوالۍ د کمال سرحدي ښوونځي ښوونکي کريم پژواک خبري اژانس سره په خبرو کې وويل چې د يادې سيمې ټول قبايل په افغان خاوره کې د لېسو د نه شتون له امله خپل ماشومان پاکستانيو ښوونځيو ته د زده کړو لپاره لېږي.
ده زياته کړه، که د پوهنې رياست د برمل ولسوالۍ د باډر په سيمه کې يوه مجهزه لېسه چې په ټولو درسي توکو سمبال وي، ولري، د دې ولسوالۍ ټول اوسېدونکي به همغه ورځ خپلو ماشومانو ته له کرښې اخوا د زده کړو اجازه ورنه کړي.
د باډر د بازار يو بل اوسېدونکی فريد وزیر وايي، دوه وروڼه يې له کرښې هاخوا په پاکستانيو ښوونځيو کې له دې امله زده کړې کوي چې په افغان خاوره کې ورته د زده کړو سيستم نه دى جوړ شوی.
د ده په خبره، ورور يې يوولسم ټولګي کې زده کړې کوي، خو په باډر کې داسې لېسه نشته چې هغه دې يوولسم ټولګی ولري او نه هم ورته د کال تر اخره زده کوونکو ته درسي کتابونه رسيږي.
نوموړي غوښتنه وکړه چې حکومت دې د يادې ولسوالۍ ښوونځيو ته پاملرنه وکړي، د زده کړو زمينه دې ورته برابره کړي او دوی دې هم د پاکستان له مجبوريت څخه وژغوري.
يو زده کوونکی اکبر وايي چې په خپله خاوره کې ورته د زده کړو زمينه نه ده برابره، ځکه دوی له کرښې اوړي.
د پکتيکا د پوهنې رياست تدريسي مرستيال محمد نسيم واجد پژواک ته وويل چې دوی په برمل ولسوالۍ کې څلور بند ښوونځي هم خلاص کړي او هڅه کوي په ياده سيمه کې د نورو لېسو ترڅنګ يوه نمونوي لېسه هم جوړه کړي.
د هغه په وينا، د پوهنې رياست سرحد ته ځانګړې پاملرنه لري او ورځ تر بلې به د خلکو يادې ستونزې هواروي.
ده زياته کړه، د کتابونو ستونزه يې له تېرو ۱۵ کلونو را هيسې شته او تر اوسه ورته په پوره شمېر کتابونه نه دي رسېدلي.
بايد وويل شي چې اوس هم د ۶۰۰ زده کوونکو په شاوخوا کې افغان ماشومان له کرښې هاخوا اوړي او په پاکستانيو ښوونځيو کې زده کړې کوي.
غړيYou need to subscribe to view the full article. Please login or register a new account.
