چاريکار (پژواک، ٣ چنګاښ ٩٨): د پروان اوسېدونکو د یوه دیني عالم د نیولو په غبرګون کې چې حکومت له وسله والو طالبانو سره پر همکارۍ تورنوي، د پولیسو یوه پوسته سوځولې ده.
یوې امنیتي سرچینې د نوم نه ښودو په شرط دغه دیني عالم له وسله والو طالبانو سره په همکارۍ تورنوي وویل، کرده معلومات موجود دي چې ملا عبدالصبور په بګرام او ګجرخېلو کې د طالبانو مهم کس دی.
سرچینې زیاته کړه، تېره ورځ ناوخته امنیتي سرتېري د عبدالصبور د نیولو لپاره ګجرخېلو ته ولاړل خو د دغه کلي د اوسېدونکو له غبرګون سره مخ شول خو یاد کس یې ونیوه.
د سرچینې په خبره، له دې پېښې وروسته له زرو ډېرو کسانو چې ځینو یې وسلې هم لرلې، څو ځایه لاره بنده کړه او د ګجرخېلو په سیمه کې یې د امنیتي پولیسو یوه پوسته له یوه کرولا موټر او یو موټر سایکل سره یو ځای وسوځوله.
سرچینې زیاته کړه، موټر او موټرسایکل د همدې پوستې د منسوبینو وو او لاریون کوونکي د شپې تر لسو بجو په سیمه کې موجود وو.
د پروان د ولایتي شورا منشي او د دغه ولایت د بګرام ولسوالۍ د دهن میدان اوسېدونکي شمس الحق شیخاني وویل، مولوي عبدالصبور د دې ولسوالۍ په ګجرخېل سیمه کې د یوې دینې مدرسې مدیر و.
نوموړي زیاته کړه، عبدالصبور یو دیني عالم او ښه انسان دی او له هغه څخه یې کوم بد عمل نه دی لیدلی.
خو د ده په خبره، ښايي حکومت اسناد پیدا کړي وي چې له مخې یې یاد دیني عالم نیولی دی.
پژواک هڅه وکړه چې په دې اړه د ګجرخېلو له اوسېدونکو سره خبرې وکړي خو اړیکه یې ورسره ټینګه نه شوه.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن