کابل (پژواک، ١١ لېندۍ ٩٨): د عامې روغتیا وزارت وایي، د اندونیزیا په مرسته په کابل کې جوړ شوي کلینیک ته پېرل شوي توکي بې کیفیته دي، خو قراردادي شرکت بیا وایي ځکه یې توکي بې کیفیته بلل کېږي چې رشوت يې نه دی ورکړی.
د اندونیزیا هېواد په مرسته د کابل ښار په احمدشاه بابا مېنه کې یو کمپلکس جوړ شوی دی؛ د دغه کمپلکس اړوند اسلامي مرکز کار په ۱۳۹۶ کال کې بشپړ شوی او په کار یې پیل کړی او د ۲۳ بسترونو لرونکی کلینیک د ۱۳۹۸ کال د وږي میاشتې په وروستیو کې جوړ شوی، خو تر اوسه یې کار نه دی پیل کړی.
ځینې سرچینې وایي، د کلینیک طبي وسایلو پر سر د عامې روغتیا وزارت، قراردادي شرکت او کابل کې د اندونیزیا سفارت ترمنځ د را ولاړې شوې لانجې له امله دغه کلینیک فعالیت نه دی پیل کړی.
د عامې روغتیا وزارت وایي چې د یاد کلینیک د ودانۍ جوړولو او طبي وسایلو برابرولو چارې د «ضیا ایوبي» ودانیزو چارو شرکت، په کابل کې د اندونیزیا له سفارت سره د شوي تړون له مخې ترسره کړې دي.
خو د دغه وزارت د مالي او اداري چارو مرستیالې مموسۍ زیور پژواک خبري اژانس ته وویل: «د قراردادي شرکت له خوا باید د ۴۷۰زره ډالرو په قیمت با کیفیته وسایل راوړل شوي وای، خو دغه شرکت ټول بې کیفیته طبي وسایل په ارزانه بیه راوړي دي.»
هغې زیاته کړه چې د عامې روغتیا وزارت د ضیاء ایوبي شرکت ته د طبي وسایلو یو تایید شوی نوملړ ورکړی و چې له مخې یې باید د یاد کلینیک لپاره اړین طبي وسایل وپېري، خو پېرل شوي توکي بې کیفیته دي.
زېور وایي چې عامې روغتیا وزارت دغه توکي رد کړي، ځکه چې د تړون له شرایطو سره برابر نه و.
هغې وويل چې د دغه وزارت چارواکو څو ځلې په کابل کې د اندونیزیا له سفیر او د هغه له مرستیال سره لیدلي او ورته ویلي یې دي چې هرکله شرکت د تړون مطابق وسایل وپېري، وزارت به یې تایید کړي.
د زېور په وینا، د دې لپاره چې کلینيک په کار پیل وکړي، وزارت پتېیلې ده چې خپل طبي وسایل په کې نصب کړي او کله چې شرکت له تړون سره سم طبي وسایل وپېرل، وزارت به له هغو وسایلو په نورو برخو کې کار واخلي.
د پنځوس زره ډالرو رشوت دعوه
یوه سرچينه چې نه غواړي نوم یې څرګند شي، وایي د عامې روغتیا وزارت د روان کال په وږي میاشت کې یوه تخنیکې ډله وګومارله څو کلینیک ته پیرل شوي طبي وسایل له تړون سره سم و ارزوی.
ده زیاته کړه: «دغه ټیم د خپلې ارزونې په پای کې د طبي وسایلو قراردادي ته ویلي وو چې موږ ته ۵۰ زره امریکایي ډالر راکړه چې راوړي مالونه دې درته صحت اجرا کړو، که نه نو پېرلي وسایل دې بدل دي او نه یې اجرا کوو.»
د ده په وینا، کله چي قراردادي شرکت د عامې روغتیا وزارت له ټاکل شوي ټيم سره د ۵۰ زره ډالرو خبره ونه منله، د اندونیزیا سفارت ته یې وویل چې ټول برابر کړي طبي وسایل یې بی کیفیته دي، بېرته یې دې انتقال کړي او د روغتیا وزارت په خپله دغه کلینیک ته د نړۍ تر ټولو عصري وسایل اخلي.
د هغه په وینا، دغه کار د اندونیزیا سفارت دې ته اړ کړ چې د لیندۍ په شپږمه خپل ځیني مالونه له کلینیک نه بېرته ولېږدوي.
دی وایي، د سیمې خلکو له کلينیک نه د توکو د لېږد مخالفت کاوه، خو سفارت قناعت ورکړ.
سرچینه زیاتوي: «سفارت د سيمې خلکو ته قناعت ورکړ، کله چې افغان دولت هر وخت خپله د روغتیا وزارت اصلاح او ستونزه حل کړي، دوی به خپل وړي وسایل بېرته کلینیک ته راوړي.»
پژواک هغه ثبت شوي غږونه هم ترلاسه کړي چې دوه کسان د ټیلېفون له لارې په دې اړه له یو بل سره خبرې کوي.
په دغه مکالمه کې، یو کس له بل پوښتنه کوي چې د تېرې ورځې په ناسته کې څه وشول؟ دویم کس ورته وایي: «د قراردادي شرکت مشر د ټولو په مخ کې وویل چې عامې روغتیا وزارت د صمد علي په مرسته له دغه شرکت څخه ۵۰زره امریکایي ډالرغوښتي، څو ورته راوړل شوي طبي وسایل مثبت و اروزي او دغه کلینیک ګټې اخيستنې ته وسپاري.»
صمد علي د یاد ټيم غړی او د دغه کلينیک رییس دی.
د ضیا ایوبي قراردادي شرکت مشر وحیدالله ابراهیمي وایي چې دغه شرکت یاد کلینیک ته له هغو مشخصاتو سره سم توکي پېرلي وو چې د عامې روغتیا وزارت منلي وو او د نصب هدایت یې هم ورکړی و.
ده په دې اړه د بهرنیو چارو وزارت د یو مکتوپ کاپي هم پژواک خبري اژانس ته ورکړ.
په مکتوب کې چې د روان کال د زمري میاشتي په ۱۱مه د اندونیزیا سفارت ته لیکل شوی، راغلي: «د عامې روغتیا وزارت، د کابل په احمدشاه بابا مېنه کې د اندونیزیا د اسلامي مرکز کلینیک لپاره د طبي او غیر طبي او لابراتواري وسایلو نوملړ تایید کړی او غوښتي یې دي څو سفارت قراردادي شرکت ته هدایت ورکړي چې دغه توکي نصب کړي.»
ده د پنځوس زره ډالرو رشوت غوښتنې په اړه یوازې دومره وویل: «وروسته له هغه د عامې روغتیا وزارت یو بل پلاوی وټاکه چې بهانه یې پیسې اخيستل وه او زموږ ټول وسایل یې په خپله ارزونې کې بی کیفیته و ارزول.»
«بې کیفیته توکي مثبت نه شو ارزولای»
خو د دغه کلينیک مشر صمدعلي بیا د رشوت غوښتلو تور ردوي او وایي: «دغه هیئت د طبي وسایلو د کیفیت ارزونې لپاره ټاکل شوی و او مخکې چې موږ څه منلي وو، هغه صرف د طبي وسایلو لېست و، اوس موږ نه شو کولی بې کیفیته طبي وسایل مثبت و ارزوو.»
پژواک د ایمېل له لارې په کابل کې د اندونیزیا له سفارت سره اړیکه ټینګه کړه او د یادې ستونزې په اړه يې ترې وپوښتل، خو ځواب یې ترلاسه نه کړ.
غړيYou need to subscribe to view the full article. Please login or register a new account.
