کابل (پژواک، ٢٦ مرغومی ۹۸): د پژواک موندنې ښیي چې په ۲۰۱۹ زېږديز کال کې د کابل ښار په څلورو دولتي روغتونونو کې ۳۷۰ سوء شکل ماشومان زېږېدلي دي.
د طبي معلوماتو پر بنسټ، سوء شکل د ماشوم د بدن یوې غیر نورمالې برخې ته ويل کېږي چې يا تشکل نه کوي او يا هم د يوه لامل له امله خپل نورمال وظیفوي سیستم له لاسه ورکوي.
د پژواک خبري اژانس خبريالې د سوء شکل ماشومانو د شمېر پيدا کولو په موخه د کابل ښار څلورو دولتي روغتونونو، ملالۍ زېږنتون، استقلال، رابعه بلخي او د خیرخانې مینې ۱۰۲ بستر ته ورغلې ده.
د ملالۍ زېږنتون د ماشومانو برخې ټرينر متخصصې ډاکټرې شهربانو پژواک ته وویل چې ۲۰۱۹ کال کې ۸۰ سوء شکل ماشومان په دغه روغتون کې زېږدلي چې د دوو جنيست هم مشخص نه شو.
د نوموړې په وینا، په ۲۰۱۸ کال کې ۱۰۶ سوء شکل ماشومان زېږدلي وو خو سږ کال يې کچه ټيټه ده.
شهربانو زیاتوي، هره ورځ شاوخوا له ٧٠ تر ٧٥ ماشومان زېږي چې تر ټولو ډېر سوء شکل ماشومان د مارچ او تر ټولو کم یې د ډسمبر په میاشت کې زېږدلي دي.
همدا راز د استقلال روغتون د معلوماتي برخې امر، ډاکتر جلیل وفا پژواک ته وویل چې په ۲۰۱۹ کال کې په یاد روغتون کې ۵۵ سوء شکل ماشومان زېږېدلي چې تر ټول ډېر یې د اکتوبر او تر ټولو کم یې د جنورۍ په میاشت کې دي.
همدارنګه د رابعې بلخي روغتون د ماشومانو برخې ټرېنر متخصصې لطيفې وردګ پژواک ته وویل چې په یاد روغتون کې د ۲۰۱۸ کال په پرتله د سوء شکل ماشومانو د زېږون کچه لوړه شوې ده.
د وردګ په وینا، په ۲۰۱۸ کال کې شاوخوا ۱۶۴ سوء شکل ماشومان زېږدلي او په ۲۰۱۹ کال کې یاده شمېره ۲۲۱ ته لوړه شوه.
همدا راز د کابل د خیرخانې د ۱۰۲ بستريز دولتي روغتون د ماشومانو برخې ټرېنر متخصصې ډاکټرې شعلې پژواک ته وویل چې په ۲۰۱۹ کال کې ۱۴ سوء شکل ماشومان زېږېدلي دي چې تر ټولو ډېر یې د جون په میاشت کې وو.
له يوې خوا که سوء شکل ماشومان له خپل حالته ځورېږي، خو کورنۍ يې هم په ستونزو کې وي.
په دې اړه د ننګرهار د مرکز د جلال اباد ښار د روښان مېنې اوسېدونکي محمد ناصر ملکزي پژواک ته وويل چې ورپسې ورور يې محمد شفيق په نورمال حالت نه دى زېږدلى.
هغه وايي: ((د ورور سر مې له عادي حالت نه غټ دى، په خپلو پښو هم سم نه شي ګرځېدلی، ژبه يې هم درنه ده، همدا مور مې ده چې د ده خدمت کوي، که مور مې نه وي، هېڅوک ځان ته نږدې نه پرېږدي چې دا يو لوى مشکل دى.))
د سوء شکل ماشومانو په اړه په کابل کې د کیور روغتون د پلاستیکي جراحي ډاکتر سید الفت هاشمي پژواک ته وویل چې له طبي پلوه سوء شکل د ماشوم يوې غیر نورمالې برخې ته ويل کېږي.
د نوموړي د معلوماتو له مخې، جنيټیکي عوامل، بېسوادي، پر خپل سر د درملو خوړول، له وخته مخکې زېږون، له نږدې خپلوانو سره واده کول، د زېږون ترمنځ د وقفې نه مراعاتول، د میندو خوارځواکي، انتاني عوامل او جګړې هغه څه دي چې د سوء شکل ماشومانو په زېږېدو کې عمده رول لوبوي.
د هاشمي په وینا، کله چې ماشوم د مور په ګېډه کې وي، نو لومړى درې مياشتې ډېرې حساسې دي او امکان لري چې په دې موده کې پورتني عوامل د سوء شکل لامل شي.
د هغه په خبره، د سوء شکل د مخنيوي په موخه بايد د عامې روغتيا وزارت د ميندو لپاره د عامه پوهاوي پروګرامونه ترسره کړي.
د همدې راپور پر بنسټ، په روغتونونو کې ډېرى سوء شکل ماشومان د سپينو بايفيديا (د ملا په تېر کې ستونزه) او هايدرو سفل (د سر غټوالى) په بڼه پيدا شوي دي.
همدازار د کابل پوهنتون د اروا پوهنې پوهنځي استاد شرف الدین عظیمي پژواک ته وویل چې په ماشومان کې د سوء شکل ناروغي معمولاً د جنیټيکي ستونزو له امله رامنځته کېږي.
عظیمي وايي، دا ډول ماشومان له لومړيو کلونو د خپلې ناروغۍ له امله ځورېږي او وروسته بيا له رواني ستونزو سره مخ کېږي.
نوموړي زیاته کړه چې له سوء شکل ماشومانو سره بايد د کورنۍ غړي او په ټولنه نور کسان ښه او عاطفي چلند وکړي، څو دغه ډول کسان له رواني ستونزو وژغورل شي.
بل لور ته د چارو يو شمېر پوهان پر دې باور دي چې د جګړې دوام او بيوزلي په هېواد کې د سوء شکل ماشومانو د پيدا کېدو عمده عوامل بلل کېږي.
غړيYou need to subscribe to view the full article. Please login or register a new account.
