کابل (پژواک، ۲۵ وری ۹۹) : د کندهار امنیه قوماندان مل پاسوال تادین خان وایي چې د وسله والو طالبانو لخوا ټول ۲۰ تنه ملکي وګړي خوشې شوي، نظامیان پکې نشته.
وسله والو طالبانو پرون اعلان وکړ، چې د سولې په ترڅ کې یې د کندهار په شاه ولیکوټ ولسوالۍ کې د افغان دولت ۲۰ تنه عسکر د سره صلیب نړیوالې کمیټې ته سپارلي دي.
د کندهار یوې امنیتي سرچینې د وري په ۲۵مه، پژواک اژانس ته وویل چې دغه کسان پرون ناوخته ښار ته ورسیدل او د سره صلیب لخوا د ملي امنیت ریاست ته وسپارل شول.
د کندهار امنیه وقماندان مل پاسوال لخوا نن په دې اړه یو سپیناوی خپور شوی او ویلي یې دي چې د طالبانو له لوري په کندهار کې د سولې په نوم خوشې شوي کسان ټول ملکي وګړي دي او نظامیان پکې نشته.
هغه زیاته کړه، چې د شلو کسانو له ډلې یواځې یو تن یې ۱۱ کاله مخکې په پولیسو کې دنده درلوده، خو وروسته یې پرې ایښې وه.
تادین خان ویلي چې طالبان د سولې پروسه کې رښتینې نه دي، دوی مخکې هم یو شمېر ملکي وګړي د امنیتي ځواکونو په نوم کلونه - کلونه له ځان ساتلي وو.
د یادونې وړ ده، چې تر دې مخکې د افغانستان د ملي امنیت سلاکار حمدالله محب هم په یوه مرکه کې ویلي وو، چې له طالبانو سره دولتي بندیان نشته او اوس د شمیرې پوره کولو لپاره له موټرو ملکي وګړي ښکته کوي.
د افغانستان حکومت هم له تیرو څو ورځو راهیسې له بګرام زندان څخه ۳۶۱ تنه طالب بندیان خوشې کړي دي.
غړيYou need to subscribe to view the full article. Please login or register a new account.
