کابل (پژواک، ۹ غویی ۹۹) : د سعودي عربستان حکومت په ماشومتوب کې د جرمونو د مرتکبینو اعدام او نورو مجرمینو ته د دورو وهل لغوه کړل.
د سعودي د بشري حقونو خپلواک کمېسیون همدارنګه د دورو وهلو د مخنیوي خبر هم ورکړی دی.
د امریکا غږ د راپور له مخې، یاد کمیسیونویلي چې د شاهي فرمان پر اساس د سعودي له جزا قانون څخه دغه مجازات لغوه شول.
د سعودي چارواکو ویلي تر دې وروسته هغه ماشومان چې جنایت ترسره کوي، په لس کاله یا تر هغه کم بند باندي محکوم کیږي چې د خپل بند موده به د ماشومانو په زندان کې تیروي.
د دغه فرمان پر اساس تمه کیږي د هغو شپږو تنو اعدام هم لغوه شي چې دا مهال په زندان کې د مجازاتو په تمه ناست دي.
دغه کسان چې عمرونه یې له ۱۸ کلونو څخه کم و د عرب پسرلي پرمهال د حکومت ضد لاریونونو کې یې ګډون کړي وو.
دغه اقدامات په یاد هیواد کې د اصلاحاتو رامنځته کولو په هدف د عربستان د ولیعهد شهزاد محمد بن سلمان له هڅو څخه بلل کیږي.
عربستان یو له هغو هیوادونو څخه دی چې د اعدام کچه پکې لوړه ده او په هغه هیواد کې د بشري حقونو پر وضعیت تل انتقادونه شوي دي.
په سعودي عربستان کې د قتل، جنسي تیري، وسله والو غلاو، د مخدره موادو د قاچاقبرانو لپاره مجازات اعدام دی.
login or register a new account.
