ډاکتر فېروز: زما جرم دا دی چې د پنجشېر یم

کابل (پژواک، ۴ وږی ۹۹): د عامې روغتیا وزارت مخکنی وزیر ډاکتر فېروزالدین فېروز وايي چې ځکه دی لویې څارنوالۍ ته ور پېژندل شوی چې صادق دی او د پنجشېر دی.

د بازرس عالي ادارې تېره ورځ اعلان وکړ چې د جمهوري ریاست عالي مقام د سپارښتنې پر بنسټ یې وروسته له لومړنیو څېړنو د عامې روغتیا وزارت مخکنی وزیر، د دغه وزارت درې مخکنی او یو برحال معینان د وظیفوي غفلت او فساد په تور لویې څارنوالۍ ته معرفي کړي دي.

ډاکتر فېروز د دې موضوع په غبرګون کې ویلي چې د هېواد عدلي او قضايي بنسټونو ته د هر ډول ځواب ویلو لپاره چمتو دی.

هغه زیاته کړه، قانون باید په ټولو خلکو یو ډول عملي او پلی شي، یو د خدمت په بدل کې څارنوالۍ ته معرفي کېږي او بل بیا د خیانت په بدل کې ستایل کېږي.

خو نوموړي د چا نوم نه دی اخیستی.

د عامې روغتیا پخواني وزیر پوښتنه کړې چې ایا د کرونا ویروس خپرېدو په سختو ورځو کې د صادقانه خدمت بدل همدا دی چې څارنوالۍ ته معرفي شي؟

نوموړی ادعا لري، ځیني نور کسان چې د کرونا پروژو په پیسو، ډوډۍ وېشلو او اطلاع رسونې برخو فساد کې لاس لري، خپله د ولسمشر له خوا تقدیر شوي دي.

ډاکتر فېروز وايي: ((زما جرم دا دی چې زه صادق یم او د پنجشېر یم.))

هغه دغه راز خپلو معینانو ډاکتر وحید مجروح، ډاکتر شفیق او ډاکتر ماموسۍ زېور ته په خطاب کې ویلي: ((تاسو خلکو ته د صداقت قرباني یاست.))

هغه زیاته کړه ده: ((له بده مرغه، د دې پر ځای چې تقدیر شوي وای، سپکاوی مو وشو او ستاسو شخصیت کشۍ ته یې دوام ورکړ. له بې ارزښته او مفسد نظامه باید د ستاینې هیله ونه کړو، انشاالله چې خدمتونه به مو خدای ج او خلکو له سترګو نه پاټې کېږي او به پټ شي.))

د عامې روغتیا پخواني وزیر ويلي: ((مهم ټکی دا دی چې را روانه ډسمبر میاشت، په جینوا کې نړیوال کنفرانس جوړېږي او فعلي اداره باید له فساد سره د مبارزې برخه کې خپلې لاسته راوړنې ولري، لکه څنګه چې همدا اوسنۍ اداره په فساد او بې کفایتۍ کې غرکه ده، څه د ویلو لپاره نه ورته لري، اړ دی څو کسه مظلوم، بې واسطې او مخلص کسان چې په هر ډول وي، محکوم کړي.))

 د عامې روغتیا وزارت مخکني معین ډاکتر وحید مجروح هم په خپله فېسبوک پاڼه کې لیکلي: ((زه به له دې ازموینې او له دې بټۍ راوځم، انشاالله دغه ستونزې به ما نور هم ډاډمن، پوخ، لا قاطع او ژمن کړي.))

نوموړي زیاته کړې ده چې په فساد کې لاس نه لري، په فساد کې د ده ښکېلوالي سند نشته او دا به ثابتوي.

په عین وخت کې د یاد وزارت مخکنۍ معینې ماموسۍ زېور هم پژواک ته ویلي چې په هیڅ ډول فساد کې لاس نه لري او هر ډول ځواب ویلو ته حاضره ده.

پژواک هڅه وکړه څو د دغه وزارت د مخکني بل معین شفیق الله شهیم نظر هم ترلاسه کړي خو له بیا بیا اړیکو نیولو وروسته هم ونه توانېد.

غړي

You need to subscribe to view the full article. Please login or register a new account.