چارواکي: ننګرهار کې د داعش مالي او مطبوعاتي مسوولين نيول شوي

<p>جلال اباد (پژواک، ١١ لړم ٩٩): ځايي چارواکي وايي چې په ننګرهار ولايت کې د داعش مالي او مطبوعاتي مسوولينو په ګډون ددې ډلې څلور غړي نيول شوي دي.</p>

<p>د ننګرهار ولايت مقام له خوا د لړم په ١١مه، په يوه خپره شوې خبرپاڼه کې راغلي، چې د ملي امنيت د ځانګړې قطعې ځواکونو د جلال اباد ښار اتمې ناحيې اړونده ساحه کې عمليات کړي چې په ترڅ کې يې ياد کسان نيول شوي دي.</p>

<p>سرچينې زياته کړې چې په نيول شويو کسانو کې د داعش وسله والې ډالې مالي او مطبوعاتي مسوولين له دوو نورو غړو سره نيول شوي دي.</p>

<p>د معلوماتو له مخې، ياد کسان په دوو جلا عملياتو کې نيول شوي چې د عملياتو پر مهال چاته زيان نه دی اوښتی.</p>

<p>يوې بلې سرچينې پژواک ته وويل چې دا عمليات په جلال اباد ښار او ښېوې ولسواليو کې ترسره شوي چې په پايله کې يې د داعش ډلې مالي مسوول منیب مشهور په فضلي او مطبوعاتي مسوول قاري اسرائیل نيول شوي دي.</p>

<p>داعش ډلې تراوسه په دې تړاو څه نه دي ويلي.</p>