د کندهار ارغنداب کې د چاودنې له امله اووه ملکي وګړو ته مرګ ژوبله اوښتې

<p>کندهار (پژواک، ۱۷ لړم ۹۹): د کندهار په ارغنداب ولسوالۍ کې د ملکي وګړو پر زرنج موټرسایکل د سړک غاړې ماین چاودنه کړې چې له امله یې پنځه کسان وژل شوي او دوه نور ټپيان شوي دي.</p>

<p>ځايي چارواکي وايي چې پېښه نن له غرمې مخکې د دې ولسوالۍ په تابین سیمه کې شوې ده.</p>

<p>د کندهار د والي ویاند بهیر احمدي پژواک خبري اژنس ته وویل، د ملکي وګړو پر زرنج موټر سایکل هغه مهال چاودنه وشوه چې د انارو د حاصلاتو راټولولو لپاره خپلو باغونو ته روان وو.</p>

<p>دی وايي، له پېښې وروسته پولیس سیمې ته رسېدلي، ټپیان او مړي یې روغتون ته لېږدولي دي.</p>

<p>احمدي زیاتوي، په ارغنداب کې وسله والو په سلګونو ماینونه ځای پر ځای کړي چې اوسمهال یې د کشفولو او شنډولو چارې روانې دي.</p>

<p>په ارغنداب کې داسې مهال پر ملکي وګړو د سړک غاړې ماین چاودنه کېږي او هغوی ته مرګ ژوبله اړوي چې د چارواکو په وینا، تازه یې دغه ولسوالي د وسله والو طالبانو له شتون څخه پاکه کړې ده.</p>

<p> هغوی وايي، اوسمهال امنیتي ځواکونه د ماینونو په کشفولو او شنډولو بوخت دي چې تر دې مهاله يې تر ۵۰۰ ډېر ماینونه شنډ کړای شوي دي.</p>

<p>امنیتي چارواکو تېره ورځ خبر ورکړی و چې د دې ولسوالۍ بې ځایه شوې کورنۍ کولای شي بېرته خپلو کورونو ته ستنې شي.</p>