مهترلام (پژواک، ٢٣ لړم ٩٩): د لغمان د کرنې رياست چارواکي وايي چې په دغه ولايت کې سږ کال د تېر کال په پرتله د وريجو د حاصلاتو کچه پنځه سلنه لوړه شوې ده.
د لغمان د کرنې او اوبو لګولو ریيس انجینر محمد جمیل خوشحال پژواک ته وویل چې دوی له یوولس زره هکتاره کرنیزې ځمکې ٤٥ ټنه وریجې ترلاسه کړې دي.
د خوشحال په وینا، د تېر کال پرتله سږ کال د لغمان د وریجو په حاصلاتو کې پنځه سلنه زیاتوالی راغلی دى.
ده زياته کړه: ((سږ کال موسمي بارانونه نه وو، ږلۍ هم نه ده شوې او موږ کروندګرو ته اصلاح شوي تخمونه هم ورکړي وو، نو ځکه د وريجو د حاصلاتو کچه هم لوړه شوې ده.))
هغه دا هم وويل چې د دغه ولايت په اته نيم زره هکتاره ځمکه کې سبزيجات کرل شوي چې د ګاونډيو ولايتونو ترڅنګ پلازمېنې کابل ته هم استول کيږي.
دغه راز د مرکز مهترلام د میا کلا يوه کروندګر محمد اسحق پژواک ته وویل چې د تېر کال په پرتله یې د شولو په حاصلاتو کې زیاتوالی راغلی دى.
هغه وايي: ((هم مو اصلاح شوي تخمونه کرلي وو او هم موږ د کرنې رياست د کارکوونکو مشورو ته پام کړى دى.))
د لغمان د وريجو د پروسس مسوول سيداغا عرب پژواک ته وويل چې په تېر کال دوى سلګونو کروندګرو ته هندي، لاهوري، کندوزي او د تخاري وريجو اصلاح شوي تخمونه ورکړي دي.
ده وويل چې هر کروندګر ته د جريب پر سر دوه نيم منه اصلاح شوي تخمونه ورکول شوي چې اوس يې له هر جريب څخه شاخوا ١٦٠ منه شوله ترلاسه کړې ده.
د يادونې ده، تر کندوز او بغلان وروسته د لغمان وريجي په هېواد کې مشهورې دي او خلک ترې استفاده کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن