کابل (پژواک، ٢٦ لړم ٩٩): لویه څارنوالي وایي چې د ٩٧٦ هغو کسانو برخلیک لا هم نه دی معلوم چې د قتل له امله د سترې محکمې له خوا پر اعدام محکوم شوي او تر اوسه پر هغوی حکم نه دی پلی شوی.
د ولسمشرۍ د دویم مرستیال له دفتره په خپره شوې خبرپاڼه کې چې پژواک خبري اژانس ته رسېدلې، راغلي چې د کابینې د عدلي او قضایې کمېټې ناسته تېره ورځ د دغې کمېټې د رییس سرور دانش په مشرۍ ترسره شوه.
سرچینې زیاته کړې چې په یاده ناسته کې پر اعدام د محکوم شوو د برخلیک ټاکلو څرنګوالی، د وروستیو تړونونو، پرېکړو او قطعي محکمو د پلې کولو لپاره د کورنیو چارو وزارت د ځانګړې قطعې تشکیل، د شکنجې د منع کېدو او له بشري حقونو څخه د سرغړونو د مخنیوي په هکله د لویې څارنوالۍ د اداري کاري راپور او دغه راز د روان کال په لومړیو شپږو میاشتو کې په زندانونو کې د بشري حقونو د څرنګوالی په اړه د بشري حقونو خپلواک کمېسیون د راپور ارزونه وشوه.
په خبرپاڼه کې راغلي چې د لویې څارنوالۍ ادارې پر اعدام د محکوم شوو کسانو د برخلیک ټاکلو د څرنګوالي په اړه ناستې ته راپور وړاندې کړ.
د دې ادارې د راپور له مخې، ٩٧٦ کسان د قتل د ارتکاب له امله د سترې محکمې له خوا پر اعدام محکوم شوي چې تر اوسه پرې حکم نه دی تطبیق شوی.
سرچینې لیکلي چې د جلسې غړو دغه موضوع د قانون احکامو، د هېواد د عدلي او قضایي پالیسیو، د سترې محکمې د نهایی پرېکړو پلې کولو پروسیجر او دغه راز هغه ستونزې چې د دوی له ناحیې د هېواد په زندانونو کې ممکن رامنځته شي، بحث او هر اړخیزه ارزونه وکړه.
د ولسمشر دویم مرستیال سرور دانش په اعدام محکومو کسانو ته رسېدنه او د هغوی د برخلیک ټاکل هم د هغوی او هم د هغوی د والدینو قانوني حق وباله او ټینګار یې وکړ چې دغه موضوع باید په اساسي توګه تعقیب او وڅېړل شي.
د خبرپاڼې په یوه برخه کې راغلي چې په دې تړاو عدلي او قضایي کمېټې پرېکړه وکړه چې په دې اړه، د ولسمشرۍ د چارو ادارې له خوا یوه وړاندیز شوې طرحه چمتو شوې او د لویې څارنوالي د ادارې له نظر څرګندولو وروسته، ستره محکمه او د عدلیې وزارت، ولسمشرۍ ته واستول شي څو په یوه ځانګړې ناسته کې د ولسمشرۍ تر مشرۍ لاندې د لوی څارنوال، قاضي القضات، عدلیې وزیر او نورو اړوندو بنسټونو په شتون په دې اړه پرېکړه وشي.
غړيYou need to subscribe to view the full article. Please login or register a new account.
