کابل (پژواک ٨ لېندۍ ۹۹): د کابل امنیه قوماندني وایي چې د دغه ښار په شپږمه او یوولسمه ناحیو کې د چسپکي ماین په دوو جلا چاودنو کې اووه کسان ټپیان شوي دي.
د کابل د امنیې قوماندانۍ ویاند فردوس فرامرز پژواک خبري اژانس ته وویل چې نن سهار شاوخوا اووه نیمې بجې د شپږمې ناحیې اړوند په امېد سبز ښارګوټي کې پر یوه فيلډر موټر چسپکي ماین چاودنه کړې چې له امله یې درې کسان تپیان شوي دي.
دغه راز هغه زیاته کړه چې شاوخوا اووه بجې او لس دقیقې د یوولسمې ناحیې په ګولایي سینما سیمه کې پر یوه لندکروزر موټر هم د مقناطیسي ماین چاودنه شوې ده.
د نوموړي په وینا، په دې چاودنه کې څلور کسان ټپیان شوي دي.
سرچینې له جزئیاتو پرته وویل په ټپیانو کې د پولیسو دوه منسوبین او پنځه ملکي وکړي شامل دي.
د دغو دوو چاودنو مسوولیت تر اوسه چا پر غاړه نه دی اخیستی.
Visits: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن