کابل (پژواک، ١٠ لېندۍ ٩٩): د ملي دفاع وزارت ادعا کوي چې په هوايي بريد کې د غزني د وروستي موټربم بريد طراح له خپلو اووه نورو ملګرو سره وژل شوى دى.
پرون د غزني ښار د درېيمې حوزې اړوند د قلعه جوز په سيمه کې د عامه نظم ساتنې پر کنډک د موټربم بريد وشو چې په ترڅ کې يې ٣١ سرتېري ووژل شول او ٢٤ نور ټپيان شول.
د ملي دفاع وزارت له يادې پېښې يوه ورځ وروسته د يوې خبرپاڼې په خپرولو سره ويلي چې د ياد بريد طراح يې وژلی دی.
سرچينه وايي چې هوايي ځواکونو تېره شپه د غزني د ګيرو ولسوالۍ علي شېرخېل سيمه کې هدفمند بريد کړى دى.
د خبرپاڼې په حواله، په دغه بريد کې د غزني د وروستي موټربم بريد طراح حمزه وزيرستانى له خپلو اوو نورو ملګرو سره وژل شوى دى.
سرچينه زياتوي چې په دغه بريد کې د وسله والو يو شمېر وسلې او مهمات هم له منځه تللي دي.
د يادونې ده، د غزني د وروستي موټربم بريد او د ملي دفاع وزارت د يادو څرګندونو په اړه تر اوسه د افغان دولت وسله والو مخالفينو څه نه دي ويلي.
Visits: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن