پلخمري (پژواک، ٢٠ ليندۍ ٩٩): د بغلان ولايت يو شمېر ديني عالمانو او اوسېدونکو له نړيوالې ټولنې څخه په افغانستان کې د روانې خونړۍ جګړې د درولو غوښتنه وکړه.
دغه څرګندونې د بغلان اوسېدونکو نن په مرکز پلخمري کې د يوې اعتراضيه را ټولېدنې پرمهال وکړې.
د يادو کسانو له ډلې مولوي فريد احمد فروتن وويل چې په افغانستان کې تر دې وروسته د جګړې دوام نور شرعي نه ده او سياسي بنسټ نه لري.
دى وايي: ((دا ځل موږ پر نړيوالې ټولنې غږ کوو چې په افغانستان کې د روانې خونړۍ جګړې پر درېدو ټينګار وکړي.))
د نوموړي په وينا، د افغانستان جګړه ناروا او يواځې د افغانانو د وژلو لپاره يوه پلمه ده.
دغه راز مدني فعالې امنه وردګ وويل چې په روانه جګړې مېرمنې تر ټولو ډېرې زيانمنې شوې دي.
هغې وويل: ((موږ نور د روانې جګړې زغم نه لرو، پر نړيوالۍ ټولنې غږ کوو چې د افغانستان د جګړې د درولو لپاره اقدام وکړي.))
د يادې غونډې يو شمېر نورو ګډونوالو هم ورته څرګندونې وکړې او د يوه پرېکړه ليک په صادرولو سره يې له نړوالې ټولنې، د بشري حقونو له نړيوال سازمان او له نورو بنسټونو په افغانستان کې د روانې جګړې د پاى ته رسولو غوښتنه وکړه.
د بغلان اوسېدونکي داسې مهال په افغانستان کې د جګړې د درېدو غوښتنه کوي چې دا مهال د قطر هېواد په دوحې ښار کې د افغانستان د اسلامي جمهوريت او د طالبانو د استازو ترمنځ د سولې اړوند خبرې روانې دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن