ترينکوټ (پژواک، ٢٢ لېندۍ ٩٩): ځايي سرچينې وايي چې د اروزګان ولايت د دهراوود ولسوالۍ يو ځل بيا د وسله والو طالبانو په لاس سقوط کړى دى.
د دغه ولايت امنيتي سرچينې وايي چې وسله والو طالبانو تېره شپه له سختي جګړې وروسته د دهراوود ولسوالۍ بازار، ودانۍ او امنيه قومانداني نیولي دي.
د دغه ولايت يوې باوري امنیتي سرچینې د لېندۍ په ٢٢مه پژواک اژانس ته وویل، په سیمه کې مېشت ځواکونه د اردو کمپ ته تللي او دولتي ودانۍ يې طالبانو ته پرېيښې ده.
طالبانو په دې اړه تر اوسه رسنیو ته څه نه دي ویلي.
د يادونې ده، دغه ولسوالۍ تېره مياشت هم سقوط شوې وه، خو څو ورځې مخکې دولتي ځواکونو بېرته ترې ونیوه.
