کندوز ښار (پژواک، ٢٤ لېندۍ ٩٩): د کندوز په امام صاحب ولسوالۍ کې د وسله والو طالبانو په یوه برید کې لس سرحدي سرتېري وژل شوي او څلور نور ټپيان دي.
د کندوز ولايتي شورا یوه غړي خليل قاري زاده د لېندۍ په ٢٤مه پژواک خبري اژانس ته وويل چې تېره شپه وسله والو طالبانو د امام صاحب ولسوالۍ په استامينګ کلي کې د سرحدي ځواکونو پر ټولي بريد کړى دى.
هغه وايي چې په دغه بريد کې د ټولي د قوماندان تورن داوود حکيمي په ګډون لس سرحدي سرتېري وژل شوي او څلور نور ټپيان شوي دي.
دغه راز د امام صاحب د روضې سيمې اوسېدونکي شفيق الله پژواک ته وويل چې تېره شپه په استامينګ سخته جګړه شوې او امنيتي ځواکونو ته درنه مرګ ژوبله اوښتې ده.
په ورته وخت کې د کندوز د والي وياند عصمت الله مرادي هم پېښه تاييدوي خو د مرګ ژوبلې په اړه يې کره معلومات په ډاګه نه کړل.
بل لور ته طالبان هم دغه جګړه تاييدوي.
د دې ډلې وياند ذبيح الله مجاهد وايي چې طالبانو تېره شپه د امام صاحب ولسوالۍ په استامينګ کلي د حکومت پر دوو پوستو بريدونه کړي دي.
هغه وايي چې په يادو بريدونو کې ١٧ حکومتي سرتېري وژل شوي او څلور نور ټپيان شوي دي.
د يادونې ده، په دې وروستيو کې د حکومت ځواکونو او وسله والو طالبانو ترمنځ جګړو زور اخيستى دى.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن