کابل (پژواک، ۳۰ لېندۍ ۹۹): د کابل پولیس وايي، په ولسي جرګه کې د کابل خلکو د استازي الله ګل مجاهد زوی او ساتونکی یې له یو بې پلېټه زرهي موټر او یو میل بې جوازه کلاشینکوف سره نیولی دی.
د کابل ښار د دوولسمې حوزې امر لومړی څارن اجمل احمدزی وایي، یاد کسان تېره ورځ هغه مهال د کابل ښار د دوولسمې ناحیې اړوند سیمه کې نیول شوي چې «په تلاشۍ کې یې په پولیسو مرمۍ تېره کړه.»
ده وویل، په تلاشۍ کې پولیسو له نیول شوو کسانو د اسنادو پوښتنه کړې وه او ترې غوښتې یې وو چې د موټر تورې ښيښې یې سپنې کړي، خو هغوی په غبرګون کې کلاشینکوف ته مرمۍ تېره کړې وه چې وروسته پولیسو ونیول.
دی وایي چې په یاد موټر کې درې کسان وو، خو یو یې تښتېدلی دی.
هغه زیاته کړه چې نیول شوي دوه یاد کسان د کابل امنیې قومندانۍ د څېړنو ریاست ته سپارل شوي دي.
پژواک دغه موضوع د کابل له امنیې قوندانۍ او الله ګل مجاهد سره شریکه کړه خو تر اوسه یې ځواب نه دی ویلی.
Visits: 65
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن