کابل (پژواک، ١٧ مرغومى ٩٩) : په سعودي عربستان کې د افغانستان سفارت وايي چې له دغه هېواد څخه ٣٤٩ تنه افغان بنديان کابل ته ولېږدول شول.
د سعودي په پلازمېنه رياض کې د افغانستان سفارت له خوا په يوه خپره شوې خبرپاڼه کې راغلي، چې د دوى په هڅو او د سعودي عربستان د اړونده ادارې په همکارۍ ياد بنديان پرون کابل ته ولېږدول شول.
سرچينې زياته کړې، دغه افغانان سعودي عربستان ته د عمرې لپاره راغلي وو، خو بيا دلته په غير قانوني توګه استوګن شوي وو.
د افغانستان سفارت وايي چې بيا ياد کسان د سعودي د پوليسو له خوا تر نيول کېدو وروسته د بېلا بېلو سيمو په توقيف خانو کې ساتل کېدل.
په خبرپاڼه کې راغلي چې دوى د افغانستان د سفارت په هلو ځلو په وړيا توګه په يوه ځانګړې الوتکه کې هېواد ته ولېږدل شول.
د افغانستان سفارت د سعودي له حکومت څخه مننه کړې چې ددغو افغانانو په خوشې کولو او هېواد ته په لېږلو کې يې ورسره مرسته او همکاري کړې ده.
د يادونې ده چې څو مياشتې مخکې هم له سعودي څخه سلګونه افغان بنديان کابل ته لېږدول شوي وو.
