جلال اباد (پژواک، د وري لومړۍ نېته ۱۴۰۰): د ننګرهار په مرکز جلال اباد ښار کې څلورو پرله پسې چاودنو کې دوه کسان وژل شوي او څلور نور ټپيان دي.
د ننګرهار ولايت رسنيو دفتر پژواک اژانس ته وويل چې نن سهار جلال اباد ښار په بېلابېلو برخو کې څلور چاودنې شوې دي.
د سرچينې په وينا چې په یادو چاودنو کې د جلال اباد ښاروالۍ يو کارمن وژل شوی او يو بل ملکي وګړی ټپي دی.
سرچینې زیاته کړه چې په یادو چاودنو کې دوه یې د کشف شوو ماینونو وې.
د ننګرهار امنيې قوماندانۍ وياند فريد خان هم پژواک ته دغه چاودنې تایید کړې.
بلخوا د ننګرهار حوزوي روغتون وياند ګلزاده سنګر پژواک اژانس ته وويل چې د پېښو له ځايونو روغتون ته څلور ټپيان ور وړل شوي دي.
دغه راز د جلال اباد ښاروالۍ يوه مسوول نقيب احمد اتل پژواک ته وويل چې د لومړۍ ناحيې اړوند کلچه پزۍ کوڅې او د درېيمې ناحيې اړوند کرنې رياست مخې ته په دوو چاودنو کې د دوی دوه کارکوونکي چې صفاکاران دي، وژل شوي دي.
د يادو چاودنو مسووليت تر اوسه کومې ډلې پر غاړه نه دى اخيستى.
Views: 197
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن