کابل (پژواک، ١٢ ورى ١٤٠٠) : افغانستان لپاره د سویډن کمېټه وايي چې خپلې افغان کارکوونکې ښکلا ځدراڼ ته نوې دنده ورکوي، څو د خپلو هېوادوالو خدمت وکړي.
د سویډن کمېټې څو ورځې مخکې وروسته له هغه د ښکلا ځدراڼ دنده وځنډوله چې نوموړې په ټويټر کې د ميدان وردګو د غير مسوولو وسله والو د قوماندان عليپور پر ضد يو پوسټ کړى و.
نوموړې ليکلي و: “عليپور او کسان یې ژر تر ژره باید ووژل شي، دوی تروریست، باغي او بلواګر دي چې د بهرنیو استخباراتو له لوري تمویلېږي”.
ښکلا ځدراڼ دا پوسټ وروسته له هغه وکړ، چې د عليپور وسله والو په بهسودو کې د ملي اردو يوه چورلکه وويشتله او د څلورو پيلوټانو په ګډون يې نهه سرتېري ووژل.
د سویډن کمېټې ياده پرېکړه د ګڼ شمېر خلکو له خوا وغندل شوه او خلکو دغه کار د بيان ازادۍ پر ضد ياد کړ.
اوس د افغانستان لپاره د سویډن کمېټې په يوه خبرپاڼه کې ويلي چې ښکلا ځدراڼ به ژر په یو نوي پوسټ کې په دنده وګومارل شي.
سرچينې زياته کړې: ” ښکلا ځدراڼ سره هوکړه شوې چې نوموړې به سمدلاسه په نوې دنده ګومارل کیږي تر څو د افغانستان لپاره د سویډن کمېټي د ماموریت د ترلاسه کولو لپاره په نوي پوست کې خدمت وکړي”.
د سویډن کمېټې سکرټر جنرال اندریاس سټیفنسن ښکلا ځدراڼ د افغان ځوانانو او ښځو حقونو مهم غږ او د دغې کمېټې قدرمنه کارکوونکې بللې ده.
د يادې کمېټې په خبرپاڼه کې راغلي چې ښکلا ځدراڼ د خپل ټویټ په اړه چې د بېلابېلو تفسیرونو او قوي غبرګونونو د راپارېدو لامل شوی خواشیني ښودلې او ویلي یې دي چې نه یې غوښتل چې بېلا بېل تعبیرونه یا تاوتریخوالي راوپاروي.
ښکلا ځدراڼ د سویډن کمېټې له تازه پرېکړې هرکلی کړی دی. هغې په ټويټر کې ليکلې : ” د سویډن کمېټې له رهبرۍ څخه مننه کوم چې زما په اړه یې په پوره غور سره عادلانه پرېکړه وکړه. زه به ډېر ژر بېرته خپلې دندې ته ستنه شم. ”
ښکلا ځدراڼ په ملګرو ملتونو کې د افغان ځوانانو استازې ده، چې د سویډن د کمېټې په ګډون یې په یو شمېر نورو ادارو کې هم دندې ترسره کړې دي.
Visits: 711
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن